La Usc di Ladins

L é semper gustegol poder se fermèr n medeat a tor su vèlch recort da chi egn e dapodò sessaben i spartir coi letores de La Usc. L é temp da d’istà e de jir a fèr fegn. Enstadì sion jic a troèr Pierangelo Pitscheider, cognosciù te paisc desche Pelegna, fi de Enrico de Engel Rocia e Elisabetta Fosco, Beta de Janmaria… dita ence l’ameda Beta vedù che l à abù passa 30 nevoes.

Pierangelo, a l’anagrafe giust proprio Gilberto, à tout te man na fauc per la pruma outa de diesc egn e dut istà l jia ite per la mont de Salei a seèr, oujer e restelèr. Fora de sajon l jia a lurèr de pitor a sbianchejèr: »É fat la Scola d’èrt ja Poza ma no son jit inant, – l ne conta – per doventèr maester d’èrt aesse cognù jir a Unejia o a Trent, ma enlouta no n era scioldi e jà mia sor Maria Teresa la era a studièr«. Belimpont Pierangelo aea 2 frèdes e 6 sores, en dut i era de 9. Sia mère Beta la era del 1906 e l’à vivù fin del ’90, sie père Enrico enveze l é mort de 78 egn. El aea cognù jir demez en vera fin del 1942 canche i lo à lascià vegnir de outa a cèsa; entratant Beta, didèda da sie cugnà Angelo a rejer dut cant, l’aea cognù trèr inant la cèsa, la familia e fèr da om e da femena.

Se pel lejer dut su La Usc nr 33 dai 29 de aost: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Nicoletta Riz)