La Usc di Ladins

Tel cors de la festa poer i 70 egn de l'Union di Ladins de Fascia, la diretora de la sociaizon Nives Iori e la responsabola di social Nicoletta Riz à prejentà i ejic del concors ’Let’s stick ladin!’ stat via per chisc meisc passé su Instagram de l’Union.
L obietif l era chel de slarièr fora anter i joegn i adesives ladins e de creèr curc video.
Al concors, prejentà dantfora sui social da Elia Dorich che l é stat tout ju con la feides de Riccardo Zanet, à tout pèrt 13 video fac da singoi o da gropes che é stac lité dai follower e à vedù trei finalisć.
Al terzo post se à classificà Igor Bernard che à ciapà desche pest na felpa con su l logo de l’Union, al secondo l Grop de Folclor de Soraga che se à vadagnà n bel tremol e al prum post l é ruà l video de Thomas e Daniele Brunel che à ciapà na bela facera ladina.
Chest concors à didà a slarièr fora l’Union sui social e soraldut a la fèr cognoscer anter i più joegn che é stac engaissé e contenc de aer tout pèrt; duc i partezipanc à ciapà na maieta. Endèna l concors l é stat dat ju più che 4.000 stimes, segn che i se à taà fora na pèrt emportanta anter i instagrammer. I video é stac moscé a dut l publich con l compagnament de Stefano Ganz al orghen da mantesc.  (MCI)