La Usc di Ladins

Te lecordes'a mo la sëur di grosti da ula verda de l'ava? O dla fanziëutes da pavé de ti oma? Chëla sëures ie liedes a n mond de lecorc y sentimënc, l tof che te sentives a jì ite te cësadafuech, coche te ncunfertoves sun ch'la bona marënda. L maië ie lià a dut n mond de lecorc, de cultura, identità y savëi. "La persona ie, chël che la maia", coche dijova bele 1 filosof tudësch Ludwig Feuerbach.

Y propi pian via da chësta cunvinzion ti à l Istitut Ladin Micurá de Rü dat la ncëria a Paolo Vinati de fé na nrescida n cont dla cultura dl maië tradiziunel tla cin' valedes ladines. Sot al titul "Savëis y saus" iel uni realisà 15 videos da n ot-nuef menuc cun testemunianzes de persones - paures, zidladëures y cueghes - che njënia ca y fej roba da maië. N à ulù sotrissé dut l savëi che ie dovia, coche chësta cunescënzes vën dates inant da generazion a generazion y nce coche les se à mudà. L maië à n liam strënt cun la cultura y la tiera.

Elisabeth Kostner

L articul tla edizion atuela de La Usc di Ladins.