La Usc di Ladins

Cun l’ediziun dl 2025 röia la manifestaziun a süa 25ejima ediziun y despass insciö le travert dl pröm chert de secul da süa nasciüda. Chësc avisa tl ann che le paisc de Badia pó festejé i 700 agn dala pröma nominaziun scrita.

»N chert de secul é na spana de tëmp valgamia lungia«, dij le presidënt dl'Uniun Norics Val Badia y l'ideadú dl Rait Enrico Nagler. L'evënt é gnü mantigní tresfora y á ciafé meso da se desfiré ann do ann - ma ti dui agn dla pandemia n'é la manifestaziun nia gnüda a s'al dé. Oramai é le Rait n evënt cone­sciü y aprijé sura döt Südtirol y da chëstes perts vëgnel ince adalerch vigni ann indô n valgügn milesc de spetadus, por amiré i ciars y i ciavai infornis sö y ciafé la benedisciun en la festa dl sant protetur San Linert.

Dala pröma ediziun dl 1998, cun na defilada de n valgügn ciars y presciapüch 10 ciavai, é le Rait rové n scalin plü alalt. Sëgn defilëia plü de 150 ciavai y passa 700 porsones da dötes les perts dl Südtirol, cun zacotan de ciars infornis y na presënza sterscia de uniuns, musighes y grups da dötes les valades ladines. Le comité d’organisaziun á daimproía fat n vare al iade. Sëgn dij i dui organisadus Enrico Nagler y Manfred Canins: »La sodesfaziun plü grana é da odëi che le Rait plej, che al vëgn tres plü jënt adalerch y le respet che al vëgn porté por chësta manifestaziun conesciüda oramai sura döta la regiun. Chësc dá ligrëza da fá inant y i sperun che ara vais inant bun«.


Deplü sön les novités dl Rait 2025 ciafëise da lí tla ediziun nöia da incö, vëndres ai 24 d'otober!