La Usc di Ladins

»Che l trafich ‘per fortuna’ sie recognosciù desche l problem numer un de la Dolomites l saon duc da valch an. Al trafich de ghesć e sentadins se met apede purampò ence chel semper maor de moto e supercar, de spes endrezà te binade motoristiche che vegn da desvalives stac de l’Union europeana. L istà del 2025 l é stat la sajon piora. Demò dintorn al Sela l é stat dombrà adertura 38 binade de chisc mesi che apede a le marmite averte per fèr sentir miec la ‘sinfonia’ di motores, de spes i se comporta a na vida da no poder tegnir fora ajache i peissa che nosce strade da mont sie zircuic da garejade. Ades l é ora de se remir.«

L lo disc bel adaut Massimo Girardi, president de Trandolomites, te n comunicat manà fora enstadì, olache l met dant a na vida chièra la situazion che é sot i eies de duc, soraldut tel temp de fora de sajon, canche sun noscia strèdes passa n grumon de moto e auti sportives che va coran beleche a desmostrazion de cotant che i pel jir debel.
»Gio peisse - disc Girardi - che se cogne se meter ensema e da chest pont de veduda ence gio mete l mus. Via per cheste setemane passade me é confrontà con desvalive persone te Fascia e é denunzià l fenomen a la Questura de Trent. L é temp che ence de autres mete l mus: i ombolc de le val ladine, i imprenditores, la jent, duc se fae sentir con na ousc soula e che la protesta se slarie fora sorafora la Dolomites«.

Se pel lejer dut su La Usc nr 41 dai 24 de otober, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer.


 (Monica Cigolla)