La Usc di Ladins

»L é stat na esperienza de val, na bela aventura per persones che aea la valiva pascion. No aane beleche nesciuna cognoscenza e no aon abù assà temp, ge aessa volù amancol doi meisc per arjonjèr vèlch e enveze nos aon abù demò 31 dis«, coscita à dit Almo Giambisi, anter i fondadores e prum president di Ciamorces de Fasha, do da la prejentazion del docufilm »Patagonia 1976. Spedizion di Ciamorces e menacrepes de Fascia« metù adum belimpont a pontèr via da sie material storich, tant filmac che fotografies. Na produzion che conta la spedizion de la lia fascèna te l’Argentina che no à abù bon ejit per via del catitemp, che tol ite recorc e intervistes ai protagonisć de enlouta (Alfredo Weiss, Almo Giambisi, Carlo Platter, Ettore Rasom, Gino Battisti, Ivo Nemela, Ludwig Vaia), portèda dant en antepruma en vender passà te na sala del chino Marmolèda piena e rèsa.
L president Ivan Vian à rengrazià si Ciamorces, chi de enlouta e chi d’anchecondì, e Angela Pederiva che à rencurà per cont del Comun General de Fascia chest documentèr, metù ensema per la pèrt tecnica da Fulvio De Martin Pinter, che se pel veder sul canal youtube de TV Ladina.

Se pel lejer dut sul numer stampà de en vender 21 de november, che l é ence te la boteighes de sfoes. Sul sit se pel fèr l abo e-paper per poder lejer La Usc vigni vender sul fonin, tablet o computer.  (Nicoletta Riz)