La Usc di Ladins

Jà da vèlch an la Cassa Raiffeisen Schlern-Rosengarten, con sia filiala de Fascia, met a jir te val scontrèdes con esperc per fèr crescer la competenza a livel economich anter i imprenditores locai. L ultim apuntament de chesta lingia l é stat metù a jir en jebia ai 6 de november e avert dal consulent per l setor imprenditorial de Fascia Riccardo Donei, che l à rejonà de n event pissà chest'outa en particolèr per l ambit del turism e metù a jir al restorant Zucoria de Poza, avert da pech, per palesèr l'atenzion de la Cassa envers i joegn imprenditores del post. 
A portèr dantfora l salut l é stat l president de la Raiffeisen Schlern-Rosengarten, Leonhard Resch, che l à rebadì la vejinanza al teritorie ladin sotrissan l'emportanza del control de gestion per la produtività imprenditoriala, e Rosa Carpano raprejentanta fascèna tel CdA, che à metù l azent su la parola coraje: »ge vel vardar i mudamenc, le oportunità e dapò ge jir do a nosce idee e vijion con convinzion e zenza tema« l’à dit.
Dapò l responsabol de la filiala de Fascia, Patrick Detomas, ge à dat la parola ai relatores, i consulenc del Sudtirol Wolfgang Achammer e Klaus Breitenberger, che vidé da la domanes de Paul Harich i à tout dant desvalives temes de emportanza per n imprenditor che vel fèr investimenc per smaorèr la produtività de sie hotel, rejonan ence de strategies e de tendenzes.

Se pel lejer dut su La Usc nr 44 dai 14 de november, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer.


 (Lucia Gross)