La Usc di Ladins

L é passé debota n ann (l eva de faurè del 2025!) da cánche duc i Cori del Decanat de Fodom (Coro Fodom, Coro de le Ële Col de Lana e Cori de Gliejia da La Plié, Reba e Col) i à ciapé na lëtra, firmada dal Dirighent de la Mujica da Fodom, Giuliano Federa, ulache vigniva damané de mëte a jì deberiada na gran mëssa ciantada e sonada. E coscita l’é deventada: n sabeda ai 22 de november 2025, da le 18:00 nte Gliejia da La Plié, la Mujica da Fodom auna a duc i Cori del Decanat i sonarà e ciantarà la »Missa Santa Cecilia« de Jacob de Haan.
On nconté l dirighent de la Mujica da Fodom, Giuliano Federa, che l n’à conté velch de plu su chësta scomenciadiva e su trop auter.

Giuliano, co elo nasciù l’idea

• La Mujica da Fodom, metuda su ntel 2005, per volei de Nani Gobo (Giovanni Pellegrini) e de sua fëmena Willy, co l sosten de l’Aministrazion de Comun e de trope fameie fodome. Foto de Stefano Costa
•  

View the embedded image gallery online at:
https://www.lausc.it/valedes-ladines/fodom/30727-la-mujica-e-i-cori-del-decanat-de-fodom-se-bina-duc-auna-per-la-gran-s-messa-de-santa-zezilia#sigProIddc1cba4aae

de mparé e fè na mëssa, cori e mujica auna?
Nta Fodom, on la gran fortuna de avei na gran richëza ntel ciámp mujical; spo on pensé, bele da mpuò de temp nca, che fossa sté bel biné auna duta chësta gran potenzialité per fè velch de particolar. Mëte auna duc i ciántarins e le ciántarine de Fodom e Col, vol dì avei n numer de corisć che mpermët de mëte n pe n projet mujical che i cori da soi, o la mujica da sola, no podëssa mei fè. On coscita la poscibilité de mët auna le forze e de se baraté ju na esperienza che spere che la porte duc a se ne mpaié…e po, ci elo de plu bel che podei festejé i 20 agn de fondazion de la Mujica da Fodom, auna a dute le realté mujicai de Fodom?

Percié la “Missa Santa Cecilia” de Jacob de Haan?
Davánt passa 15 agn, onva bele fat la Missa Pro Pace de Daniele Carnevali… è volù cherì fora velch da nuof! Na mëssa l’é na compojizion de plu toc, che a livel mujical l é dassën nteresciánte, ajache no l é come mëte auna plu toc desferenc. È cherì na mëssa che la siebe stada scrita aposta per Coro e Bánda, (e no che siebe n arangiament!), e la »Missa Santa Cecilia« de Jacob de Haan, siebelo a livel tecnich che de molodie e armonie la se confesc a chël che cherive e a noste carateristiche! L é ence da dì, che onva bele fat fora de mëte a jì l event n sabeda ai 22 de november, che l é l dì de Sánta Zezilia, e chësta mëssa l’é stada scrita proprio n onour de Sánta Zezilia, spo l é dut che passeneia!

De plu tla edizion stampeda de La Usc di Ladins o sun l e-paper a paiament www.lausc.it/e-paper