N grop de raprejentanc de la sozietà fascèna se à troà, ensema ai enrescidores del projet european DIGICHer, per lurèr sul archivie de fotografies de Franz Dantone Pascalin.
En vender ai 24 de otober, te sala grana del Istitut Cultural Ladin ‘Majon di fascegn’, l é stat l secondo workshop endrezà te Fascia dai enrescidores del projet DIGICHer, olache chisc à podù tor su de neva informazions e neves stimoi da la mendranza ladina, utoi per l studie di prozesc de digitalisazion de la cultura e de la partezipazion de la comunanzes.
A la scontrèda à tout pèrt presciapech chinesc raprejentanc de desvalives setores de la sozietà fascèna, dal ciamp de la scola a chel de l’èrt, dai operadores del turism ai esperc de la tecnologies de digitalisazion, che se à binà per lurèr ensema ai enrescidores del Istitut Talian di Studies Germanics, una de la istituzions de enrescida che fèsc
pèrt del projet DIGICHer. A desferenza del prum workshop, stat amò de firé, l lurier di enrescidores e di partezipanc l é stat più focalisà: chest’outa l é stat metù sun desch l projet del archivie Franz Dantone Pascalin, te chel che la Majon di fascegn, ensema al patron Lorenzo Dezulian, à digitalisà la lèstes fotografiches toutes su dal fotograf da Gries anter l Otcent e i prumes egn del Nefcent. I partezipanc à cognù se fegurèr de esser enrescidores che cogn tor contat con la comunanza, pissèr al conzet de digitalisazion, e soraldut chierir de fèr la domanes giustes e proèr jà a se dèr i prumes sboc de responetes.
Se pel lejer dut su La Usc nr 44 dai 14 de november, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer. (MCI)
