La Usc di Ladins

Bele d'ansciuda ova la Mujiga fat l cunzert "Lumen" y tl scumenciamënt de setëmber mo la festa sun plaza de Chemun che à durà doi dis. 
N dumënia ai 16 de nuvëmber à la Mujiga de Suelva tenì n cunzert tla palestra dl luech n ucajion di 100 ani dla lia, per finé via y zelebré nscila chësc ann "d'or". 
L scumenciamënt dl cunzert à la Mujiga de Sëlva fat cun n video de nteligënza artifiziela: i prims cumëmbri dla Mujiga dl ann 1925 deventedes "vives". Tl video àn udù chisc ëi jëuni dan a si luech da paur y coche i se à prejentà. Do n pitl teater da rì dla prima proa ulache i cumëmbri dla Mujiga dl 2025 ne savova mo nia drë' co suné, àn scumencià cun la pert dl cunzert, pra chëla che n à sunà nuef pec desfrënc. 
Pra la Mujiga de Sëlva iel al mumënt mpue plu de caranta cumëmbri. L ie sibe ëi che ëiles che sona y danter la persona plu de tëmp y chël plu jëuna iel 70 ani de desfrënza: l plu de tëmp à 81 ani, l plu jëunn 11. Per Amelie, Diana y Sara, trëi jëunes che fej la scola mesana, ie chësc stat si prim cunzert.
Tres la sëira à menà Florian Lardschneider.

Dut l articul iel da liejer tla edizion nueva de La Usc che vën ora chësc vënderdi ai 21 de nuvëmber.

Julia Lardschneider