La Usc di Ladins

50 agn Uniun Musighes Val Badia
Le iubileum vëgn festejé en domënia ai 16 de novëmber a Corvara, cun na festa dles musighes de döta la valada
Les musighes dla Val Badia inviëia dër bel düc canc ala festa di 50 agn dl’Uniun Musighes Val Badia, ai 16 de novëmber tla hala dl tennis a Corvara.
Le program mët man dales 9:30 cun la defilada dles musighes dla valada; dales 10:00 él la santa mëssa sonada da dötes les musighes; dales 11:00 vëgnel porté i salüc dles autorités. Dedô él deplü conzerc, olache al sona la Musiga di jogn dla Val Badia, la Val Badia »Youth Wind Band«, la Musiga dla Val Badia (cun le grup »Saxroyal« y la ciantarina Anita Obwegs) y la Böhmische di jogn dla Val Badia. Al vëgn pité da mangé y da bëre. Dötes les musighes dla Val Badia se conforta ala festa y da ves saludé.

Na gota demassa
Sot a chësc titul vëgnel metü a jí a Badia trëi sëres d’informaziun y eserzizi de prevenziun cuntra l’incontinënza y l’arbassamënt uterin
Le Consëi de formaziun Badia mët a jí n curs de ginastica por ëres. Ara se trata de trëi sëres d’informaziun y eserzizi cun la referënta Albina Pescoller, olache ara nen jará de prevenziun cuntra l’incontinënza y l’arbassamënt uterin. Les sëres vëgn tignídes i mercui ai 12, ai 19 y ai 26 de novëmber, dagnora dales 20:00 ales 21:00, tla palestra dla scora elementara de Badia. Iscriziuns pro Margit al numer de telefon 340 3438709.

»Evensong« tla Val Badia
Indoman sabeda, ai 8 de novëmber 2025, dales 20:00, a La Val
Indoman sabeda, ai 8 de novëmber 2025, dales 20:00, te dlijia da La Val vëgnel zelebré n »evensong«, na forma nöia de oraziuns da öspi ciantada y sonada deboriada da deplü cors de dlijia dla valada. Düc é bel inviá da cianté para o ascuté sö. A invié él la seziun Cors de dlijia sot al’uniun EPL-Ert por i Ladins.

Le »Calënder Ladin 2026« é dan man
L’uniun EPL-Ert por i Ladins á dé fora la 65. ediziun dla pratica ladina. En vëndres ai 14 de novëmber 2025 dales 18:00 vëgn le liber nü presenté tl »Studioa Zona« a Pedraces/Badia
Le »Calënder Ladin« por l’ann nü 2026 é gnü fora. Al vëgn venü da sëgn inant da ciasa a ciasa y te plü botëghes y posć dla valada al prisc de 15,00 Euro. En jöbia ai 14 de novëmber 2025 dales 18:00 vëgnel presenté ofizialmënter te na manifestaziun leterara y culturala tla lerch artistica nöia »Studio Zona« (ex botëga Graus) a Pedraces/Badia.

Cunzert de Santa Zezilia
La Mujiga de Santa Cristina nvieia duc canc a si cunzert de Santa Zezilia
N dumënia, ai 9 de nuvëmber dala 17:00, nvieia la Mujiga de Santa Cristina – coche uni ann – al cunzert tradiziunel de Santa Zezilia. I musicontri y la musicontres à mparà ite, sot ala bachëta de Christian Hofer, n bel prugram cun pec d’uni sort. Chësc cunzert, che unirà fat tla palestra de Santa Cristina, stluj ju n ann plën de atività. La Mujiga ie al mumënt metuda adum da 50 cumëmbri y duc canc se ncunforta sun vosc unì!

»Biodegradabl«
Cabaret ladin cun Pepi y Zenzo
Pepi Costner y Zenzo Obwegs in­viëia a so cabaret nü dal titul »Biodegradabl«, olache ai nes porta fora por n iade umoristich y mu­sical danter hotspots, Dolasila, turism sostenibl, iagri y rodes, campers y microplastica. Döt cun öna na gran domanda: é bëgn döt bio­degradabl?
Chisc é i termins dles rapre­sentaziuns: ai 12.11. tl salf dles manifestaziuns da La Val, ai 15.11. tla Ciasa J. B. Runcher a Badia, ai 16.11. tl salf dles manifestaziuns d’Al Plan, ai 19.11. tl gran salf dl Istitut Ladin a San Martin de Tor, ai 21.11. tl salf dles manife­staziuns a Corvara.
Dagnora dales 20:00. L’entrada é debann y al n’ó ester degöna prenotaziun.

Le Rait de San Linert dles valades ladines y de Südtirol
Ai 8 y 9 de novëmber vëgnel metü a jí la 25ejima

• 
•  

View the embedded image gallery online at:
https://www.lausc.it/manifestazions-y-evenc/30695-manifestazions-atuales-speziales#sigProId6b3b0562aa

ediziun dl Rait de San Linert. Tratan la defilada podarán odëi plü co 150 ciavai y al gnará pité le spetacul dl »Oswald von Wolkenstein Ritt«
Le Rait de San Linert festejëia en chësc ann la 25ejima ediziun y le paisc de Badia se arjigna a festejé le iubileum. La festa mët man la sabeda ai 8 de novëmber tla tënda dlungia la Ciasa J. B. Runcher a Badia, cun musiga di grups »Da Piz a Ciantun« y »Rise O’Clock«. Dales 18:30 inant vëgnel ince dé fora da mangé. La domënia jará spo inant la festa cun la santa mëssa dales 9:30 tla dlijia de Badia y dales 10:45 podarán odëi la defilada da Pedraces cina a San Linert, a chëra che al tolará pert plü co 150 ciavai haflingher y norics dles valades ladines y de döt Südtirol. Chisc gnará spo benedis pro le paiun da pert de siur degan Iaco Willeit. Deplü musighes y grups dl bal popolar abelirá la festa y an podará odëi i ciars infornis sö y güces cun guanc da zacan.
Le spetacul dl »Oswald von Wolkenstein Ritt«
Sön la pastöra da Jonorëis podarán ti ciaré dales 13:30 al spetacul dl »Oswald von Wolkenstein Ritt« cun trëi scuadres che se mosöra te döes disciplines. La festa vá inant cun musiga dal ví sides tla tënda sciöche ince tla ciasa dles uniuns a Badia, olache al vëgn dé fora spezialités gastronomiches da pert dles uniuns di paurs, di stödafüch y dla musiga de Badia. Dales 15:30 él söl program le conzert cun Alexander Rier tla tënda y dedô sarál le grup »Rifflblech« che se crüzia dl intratignimënt musical. La manifestaziun vëgn tignida ince sce al foss bur’ tëmp.

N secul de mujiga – Mujiga de Sëlva
N dumënia ai 16 de nuvëmber dala 17:00 nvieia la Mujiga de Sëlva a unì a scuté su n viac melodich dla storia dla lia tla palestra Pranives
Sot ala bachëta de Alexander Perathoner sona i passa 40 musicontri n prugram particuler che dëssa vester na reprejentazion dl’atività dla lia di ultims cënt ani. Tres sonn, fotografies y na criazion video fata aposta per l’ucajion, che ti dajerà vita ala mujiga te si furmazion uriginela dl 1925, puderà l publich viver n viac tl tëmp da marueia. Pec coche »The Golden Year« y »Jubelklänge Marsch« spidlea l umor solenn che se tira tres la sëira, cumpanieda dal cumentar de Florian Lardschneider. L sarà nce da audì la prima esecuzion dl pez scrit aposta per chësta ucajion da Alex Designori, che sunerà nce n pez solo.