La Usc di Ladins

Maiadives per nosta jënt che à debujën
Duman sada ai 15 de nuvëmber iel inò eura per l'azion dla mëises dala spëisa
Dan la butëiga Conad de Urtijëi saràl duta la sada ulenteres pra chësta azion. Chi che va te butëiga a cumpré si cosses ie prià bel de cumpré mo velch sëuraprò, maiadives che l puderà pona dé ju ai ulenteres che ie iló pra l'ntreda. N prëia bel de cumpré cosses che se mantën, coche nudli, uel, tonno, riji y n. i.
I ulenteres dla Caritas fajerà l medem tal Maciaconi. I zitadins de Gherdëina ie priei bel de judé, duta la maiadives jirà a bën dla jënt manco fertuneda de nosta val.
La San Vinzent y la Caritas rengrazia bele danora.

»Biodegradabl«
Cabaret ladin cun Pepi y Zenzo
Pepi Costner y Zenzo Obwegs inviëia a so cabaret nü dal titul »Biode­gradabl«, olache ai nes porta fora por n iade umoristich y musical danter hotspots, Dolasila, turism sostenibl, iagri y rodes, campers y microplastica. Döt cun öna na gran domanda: é bëgn döt biodegradabl?
Chisc é i termins dles rapre­sentaziuns: ai 15.11. tla Ciasa J. B. Runcher a Badia, ai 16.11. tl salf dles manifestaziuns d'Al Plan, ai 19.11. tl gran salf dl Istitut Ladin a San Martin de Tor, ai 21.11. tl salf dles manifestaziuns a Corvara. Dagnora dales 20:00. L'entrada é debann y al n'ó ester degöna prenotaziun.

Generala dla lia da munt cun lîtes
La

• 
•  

View the embedded image gallery online at:
https://www.lausc.it/manifestazions-y-evenc/30722-manifestazions-atuales-speziales#sigProIdcbc2d9b2dc

Lia da Munt Ladinia – Val Badia tëgn la sentada generala en vëndres ai 21 de novëmber a San Martin. Al vëgn ince lité le consëi nü
En vëndres ai 21 de novëmber dales 19:30 él tl salf dles manife­staziuns da San Martin de Tor la sentada generala dla Lia da Munt Ladinia – Val Badia. Do le salüt da pert dl presidënt, vára inant cun la relaziun sön l'ativité desfirada tratan le 2025, por passé spo al bilanz provisor AVS y CAI.
Inant vára cun les lîtes dl consëi nü, che sará spo en ciaria dal 2026 al 2028. Al vëgn ciamó chirí jënt che á interes da daidé para pro la lia da munt. Che che foss a desposiziun, dess prëibel se anun­zié pro valgügn dla Lia.
Do les lîtes vëgnel proieté fotos de Alfred Erardi y la serada se stlüj jö cun cëna y aurela cörta.

Maria tla Revelaziun
Conzert en chësta domënia, ai 16 de novëmber 2025 dales 18:00, tla Dlijia da La Pli de Mareo
L'EPL-Ert por i Ladins inviëia al conzert sacral en chësta domënia sëra, dales 18:00, tla dlijia dl santuar marian La Pli de Mareo, por ascuté sö n conzert cun orghe, cor, saxofon y solisć:tes. Le program prevëiga la presentaziun di toc: de Girolamo Frescobaldi la »Toccata avanti il Ricercar«, dal Robertsbridge Codex »Estampie«, le »St. Magnus Hymnus« (dl 1200 ca.) y de Franz Comploi l'oratorium »Maria tla Revelaziun« (tesć de Iaco Ploner y musiga de Franz Comploi). Les solistes y i solisć dles usc é Monica Vallazza (sopran solo) y Renzo Huber (tenor solo), la direziun é de Elio Clara.

Le »Calënder Ladin 2026« é dan man
L'uniun EPL-Ert por i Ladins á dé fora la 65. ediziun dla pratica ladina. Incö vëndres ai 14 de novëmber 2025 dales 18:00 vëgn le liber nü presenté tl »Studio Zona« a Pedraces/Badia
Le »Calënder Ladin« por l'ann nü 2026 é gnü fora. Al vëgn venü da ciasa a ciasa, tla botëga La Mascotte a Al Plan de Mareo y tla Ostaria Gader a Longega al prisc de 15,00 Euro. Incö vëndres ai 14 de no­vëm­ber 2025 dales 18:00 vëgnel presenté ofizialmënter te na manifestaziun leterara y culturala tla lerch artistica nöia »Studio Zona« (ex botëga Graus) a Pedraces/Badia.

»Natöra sön lëgn«
Mostra d'ert de Gaia Lionello, dai 24 ai 29 de novëmber 2025 tl »Studio Zona« tl raiun artejanal a Pedraces (Badia)
L'artista Gaia Lionello, che á danter l'ater ince ilustré cun sü chedri le »Calënder Ladin 2026«, mët fora sü laurs tl »Studio Zona« tl raiun artejanal a Pedraces (ex ofize Boandes Graus) en gaujiun dla presentaziun dl Calënder Ladin y ince ciamó i dis do cun chisc orars: dal lönesc ala jöbia dales 15:00 ales 18:00, en vëndres y sabeda dales 10:00 ales 12:00 y dales 15:00 ales 18:00.

Curs de »kintsugi modern«
L'artista Gaia Lionello tin spo en sabeda, ai 29 de novëmber 2025 dales 15:00 ales 18:00, n curs de »kintsugi modern«, l'ert iaponeja por cuncé copes cun l'or. Por informaziuns y prenotaziuns, prëibel scrí o cherdé sö +39 333/36 53 636

N yogurt da spartì
La lia dl Teater de Santa Cristina gëura la cultrines per n pez nuef
Chëst ann à la grupa Teater de S.Cristina tëut la dezijion de purté dant doi teatri. Do l teater purtà dant da carnescià, puderons śën de nuvëmber udëi sun palch l pez da rì: »N yogurt da spartì« de Stanley Price, sot ala regia de Annemarie Schenk. La traduzion dl pez tl gherdëina ie de Elisabeth Senoner.
L se trata che Andy Dalpiaz dassëssa tò ju vel' chilo de massa y perchël l tol si fëna y va te na tlinica spezialiseda. Ma ël ne n'à deguna ntenzion de giajuné. Canche l ruva pona un muciá ora de perjon y mez mort da fam te si majon, pona... pona va danz dut mpue sotsëura.

L pez ie da udëi (for te sala de Chemun):
Juebia, ai 20.11.2025 dala 20:30 (Première)
Dumënia, ai 23.11.2025 dala 17:00
Merdi, ai 25.11.2025 dala 20:30
Vënderdi, ai 28.11.2025 dala 20:30
Lunesc, ai 01.12.2025 dala 20:30
Mierculdi, ai 03.12.2025 dala 20:30

Atëures:
Andy Dalpiaz (uem dal muet): Willy Runggaldier
Luzia (nfermiera): Valentine Insam
Nora (fëna de Andy): Brigitte Malsiner
Guido Moser (paziënt dla cësa de cura): Pasquale Ploner
Budo (vijitadëur): Werner Dejori
Duturëssa Canaider (primara dla tlinica): Heidi Rungger
Ispetëur Canins (polizai de raion): Roman Senoner

Chertes danora pòssen apusté cherdan su Paola Stuffer al nr. de telefonn: 339 33 99 266
Sun Vosc unì se ncunforta la grupa de Teater S. Cristina!

Co iela pa cun i dërc d'autëur tl'ert?
Sëira de nfurmazion tl Tublà da Nives n juebia ai 20 de nuvëmber
Te n mond ulache lëures criatifs nasc scialdi debota y nce cun la nteligënza artifiziela, lëures fac do, falsifichei, laurei ora, publichei, metui ora, stampei y metui sun l marcià, iel for plu y plu mpurtant savëi nce coche la ie cun i dërc de chësta opres y ciun dërc che à la persones che les à fates.
L aucat Anton von Walther à na gran cumpetënza te chësc ciamp y se dà ju cun chësta materia che ie tl lëur de se mudé scialdi aslune. Ël ti dajerà n'udleda de coche l ie n generel cun i dërc y coche n possa fé per scuné i lëures tl ciamp dl'ert. Oradechël mustreràl n valgun ejëmpli che ie ruvei dan suneria, ciuna rejons y duvieres che à n scritëur, n artist y nce n editëur y ciunes che ie la cunseguënzes sce zachei va a viulé i dërc d'autëur. La sëira ie n juebia ai 20 de nuvëmber dala ot da sëira te Tublà da Nives te Sëlva. Nteressei dëssa se nuzé de chësta ucajion per giapé nfurmazions de prima man. Dantaldut te Gherdëina iel truepa persones che fej ert y l ie mpurtant a savëi coche ie la situazion te si cajo.

De

• 
•  

View the embedded image gallery online at:
https://www.lausc.it/manifestazions-y-evenc/30722-manifestazions-atuales-speziales#sigProIdcbc2d9b2dc

dla porta daverta
Poscibilité da se informé söles Scores Altes La Ila y la manira da lauré, ai 21 de novëmber
Les Scores Altes La Ila inviëia al De dla porta daverta, en vëndres ai 21 de novëmber, dales 8:00 ales 12:45 te süa sënta, a La Ila. Al vëgn presenté les trëi tipologies de scora alta che fej pert dl Zënter scolastich: Istitut Tecnich Economich, Lizeum Linguistich y Lizeum dles Sciënzes Umanes (SOWI). La direturia Monika Senoner, i insegnanc y les insegnantes, i studenc y les studëntes ti dará le bëgngnü a geniturs, scolars y scolares y düc y dötes i interessá da conësce damí la strotöra de nostes scores, cun sües carateristiches y sües strumentaziuns tecnologiches, y por se fá n'idea de sciöche al vëgn lauré. Al gnará presenté valgünes novités importantes por l'ann de scora 2026/2027, olache al gnará pité n proiet scialdi interessant por le palé y le volley.

Liber y plaza por Merch Dapunt
Ai 22 de novëmber vëgnel presenté a Badia n liber sön Merch Dapunt, ai 23 de novëmber él l'inaudaziun dla plaza che porta so inom
En sabeda ai 22 de novëmber dales 17:00 él tla Ciasa Runcher a Badia la presentaziun dl liber »Plaza Merch Dapunt – en recort dl jonn Merch Dapunt vitima dl nazism«. Do le salüt dl ombolt Christian Pedevilla, él la presentaziun da pert dl autur dl liber Michael Messner y l'inrescidú dl EURAC Hannes Obermair. Ara vá inant cun recordanzes de familia da pert de Wilma Ploner y la presentaziun dla plaza »Merch Dapunt«, da pert de Stefan Taschler, Sarah Gasparotto y Lois Anvidalfarei. L'inaudaziun y benedisciun dla plaza vëgn spo tignida la domënia ai 23 de novëmber dales 11:30.

Sëira de nfurmazion n cont dl plann dl tlima de Urtijëi
L Chemun de Urtijëi nvieia duta la zitadines y i zitadins ala sëira de nfurmazions n cont dl plan dl tlima n juebia ai 20 de nuvëmber tla sala dla mostres tla Cësa di Cungresc
L vën spiegà cie che ie n plann dl tlima de n chemun y cuntà a ce pont che l Chemun de Urtijëi ie cun si plann dl tlima: Tan autes ie pa la emiscions de Urtijëi ncueicundì? Cie iel pa unit ora dala nrescida fata de mei-juni? N ie tl lëur de lauré ora l plann de azion cun mesures per la prutezion dl tlima y l adatamënt ala mudazions dl tlima, la pert zentrela dl plann, y chësc se damanda l aiut dla populazion. Unide ala sëira de nfurmazions n con' dl plann dl tlima y dijëde vosta minonga n con' dla pruposta dl plann de azion che vën purteda dant. Oradechël nfurmea Christine Romen dl Forum de energia dla suvenzions ti ciamps dl'energia y dl sciaudamënt.

Senteda generela dl KVW - Grupa de Sëlva
N sada, ai 22 de nuvëmber dala trëi domesdì uniràl tenì la senteda generela dl KVW de Sëlva tla Pitla Sala de Cësa de Cultura te Sëlva
Duc i cumëmbri y la cumëmbres ie de cuer nviei:des a tò përt. Do la relazion dl' atività cun pruiezion de fotos, la relazion di conc y l salut dla autoriteies, uniràl pità mpue de mujiga per sté n cumpanìa a se la cunté. Sambën ne manceràl nia, coche tradizion, na bona panicia y velch da pesslé.
Te chësta ucajion puderàn paië ite l cuntribut per l 2026 y n giaperà nce na blòta scincunda.
Sun Vosc unì se ncunforta dut l cumité.

Referat sön la demënza
Ai 21 de novëmber dales 19:30 él tl salf di stödafüch da San Martin le referat »A ciasa ince cun la demënza – aiüc pratics por la vita da vigni de«
La referënta Elisabeth Hofer, ergoterapista mobila, che vëgn a ciasa, dará na introduziun ala maratia, alzan fora les problematiches tla vita da vigni de y mostrará sciöche la vita dles porsones atocades y de sü familiars se müda.
I partezipanc ciafará consëis pratics por mantigní les capazités dles porsones cun demënza y mioré süa cualité de vita. Al gnará ince porté dant i sorvisc de assistënza che pó ti dé aiüt ales porsones atocades y ti alisiré les fadies ai familiars. La serada é ponsada por familiars, jënt che fej le guern y por chi che á interes da savëi deplü sön la gestiun dla demënza. Ara é debann y an ne mëss nia se prenoté. Tolede chësta ocajiun por fá domandes y baraté fora idees cun d'atri. La serada vëgn organisada dala Portina por l'assistënza y cura dl Raiun soziosanitar Val Badia.