La Usc di Ladins

La data dai 3 de dezember del 2025 restarà na dì storica per la doi sozietèdes de impianc portamont Ciadenac e Bufaure. Anché defat, do presciapech doi meisc da la doi radunanzes straordenères olache i sozi aea aproà la fujion, i presidenc Claudio Bernard e Christian Lorenz à sotescrit ofizialmenter l at costitutif de la Catinaccio Buffaure S.p.A. Sozietà Benefit.

L Consei de Aministrazion à dapò nominà Claudio Bernard president e Christian Lorenz vize president. A Elisa Maccagni che é stat dat l’encèria de AD e a Fabio Romelli de responsabol de impat per monitorèr, valutèr e garantir de arjonjer i obietives de benefizie comuns pervedui tel statut de na Sozietà Benefit. Pruma de chesta sort te duta la val, la sozietà benefit defat l é na sozietà che met apede al valor economich la finalitèdes de benefizie de la persones, del ambient e del teritorie.

»Chesta fujion – à dit Bernard – l é la evoluzion naturèla de n percors de colaborazion che va inant da egn: ensema podon sporjer na oferta turistica a l’auteza de la neva endesfides.« E Lorenz à jontà apede: »Noscia ambizion l é renforzèr l’identità de Fascia desche destinazion de ezelenza, conjobian competitività, inovazion e respet per l teritorie.«

Chesta cordanza raprejenta n travert emportant e n vèrech strategich per creèr n soul raion dai schi del zenter Fascia, bon de svilupèr sinergies operatives e valorisèr al miec l capital uman de doi realtèdes imprenditorièles che à didà a scriver la storia di impianc portamont de Fascia.

Ades la neva sozietà se met dant de investir passa 100 milions de euro dant del 2028 per l renovament di impianc, del sistem per fèr neif artifizièla e per la realisazion di coleamenc strategics, anter chisc chel de Pera-Poza-Bufaure. N impiant chief per l’integrazion di doi raions e per smaorèr la valuta de la destinazion ajache l didarà ence a ressolver i problemes de trafich su per Meida col ge portèr vantaje a duta la val.

 (MCI)