La Usc di Ladins

Doi patac fora da la schiufa, n toch de formai, mingol de capusc e pomes coc, chest l bast che 120 persone à ciapà en sabeda ai 18 de oril te oratorie de Poza te la cena solidala endrezada dal Grop Miscionarie Freinademetz/Mato Grosso. N bast da zacan, magnadiva scempia ma bona, amò miora perché frut de solidarietà: roba sporta da produtores e boteighe del post, cojinada da coghi volontadives e benedida da don Massimo.
L menù aboncont no l era segur la rejon che à spent chel gran numer de persone ruade da duc i paijes da Dèlba a Moena a tor part a na sera de condivijion e solidarietà. L zil de la scontrada l era la testimonianza de Sofia Lastei, joena de 27 egn da Poza che do se aer laureà en medejina l uton passà, de dezember la é sobito pontada via per jir a far valch meis tel Perù. Sofia à pissà de far chesta esperienza do aer sentù Anna Deluca da Vich, che era jà stata e ades la é jita endodanef a Encañada, n post a zirca 3000 metres de auteza te la region de Cajamarca, te la Ciasa Madre Teresa per bec e persone con problemes, portada inant da passa 20 egn da la infermiera trentina Daniela Salvaterra, volontara de l'Operazione Mato Grosso.
L é na legreza per l Grop Freinademetz veder che l é joegn che dezide de far chesta sort de esperienza, e amò più bel l é stat veder chela sera la gaissa e la emozion che Sofia à palesà te soa testimonianza sun chesta esperienza che, l'à dit, la ge à mudà la vita. Sofià l'à contà con parole scempie ma forte, compagnade da fotografie e curc video, che che l é Ciasa Madre Teresa, na familia per chi che no i l'à.
La jent che à tout part a la cena à sport con cher datol passa 2000 euro e dut chel che é ruà o ruarà ite  con chesta causala vegnarà manà dal Grop Freinademetz, con valch apede, per sostegnir le atività de le trei Ciase. Le donazion, che se pel meter en detrazion te la declarazion di vadagnes, va fate sul cont del Grop Miscionarie fascian (IBAN: IT85V0814035270000004036649) a chel che se pel ence ge destinar l 8 per mile metan te la declarazion l C.F.: 91009960229.


Podede lejer dut su La Usc dai 24 de oril da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)






 (Lucia Gross)