La Usc di Ladins

Fascia é zertifichèda desche na val sostegnibola ti viajes e tel turism. La bela neva é ruèda chisc dis passé a l’Azienda per l Turism de Fascia che belapontin à ciapà la zertificazion GSTC per la destinazions turistiches da pèrt de Global Sustainable Tourism Council (organisazion internazionèla che dezide e gestesc i criteries globai e l acreditament de destinazions, hotel e tour operator). »L é na gran sodesfazion e n orgolie per noscia val jir a far part del grop de destinazion che pel mosciar chesta zertificazion – à dit Fausto Lorenz president de l’ApT de Fascia – che ne engaissa a lurar con semper maor atenzion per la sostegnibilità te ogne sie aspet.«
Chest recognosciment global, frut ence de la colaborazion con Trentino Marketing, la Agenzies Teritorièles de Area (ATA) e Etifor (la sozietà de consulenza ambientèla de l’Università de Pèdua) rua a la fin de n prozes de analises, scomenzadives (desche i CleanUP Days endrezé anter setember e otober del 2025) e confronc.

Podede lejer dut su La Usc dai 24 de oril da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)

 (MCI)