La Usc di Ladins

Se sera su doman, vender ai 31 de messèl, l’otava edizion del Circen Dolomites Festival, la setemèna de evenc de circo che encoloresc de festa e legreza la mont e i paijes de Fascia. Da sabeda passèda ogne dì artisć da dut l mondo i à portà sia èrt anter piazes e paladines naturèles, con gran aprijiament da man del publich e ence del comitat de endrez di jogolieres de Circensema, stolc de portèr dant te so teritorie e per sia jent spetacoi de valuta, bogn de ge dèr luster a la mont, a na vida desferenta.

Chesta edizion se à avert con l spetacol ‘Sunsom - in Vetta’ che i jogolieres fascegn à portà japede l Ciadenac, anter la utia Vael e Baita Marino Pederiva, olache bec e gregn é resté maraveé da la braures di artisć che jia con funs, cheiles e balotes.
Amò anché, jebia ai 30 e doman, vender 31 de messèl l é la Circen Festa a Soraga. Te Pra del preve duc i dis spetacoi per la families via per l domesdì e dapò ence da sera con artisć de circo de spessor internazionèl e conzerc de n grop desferent, dai PopCorner, ai Maestres de Schi, a la ciantarina catalana Lia Sampai che l an passà à vent l Festival Suns Europe dedicà a la museghes tel lengaz de mendranza. Chest an la neva de gran marevea l é la Escape Caravan de la Scola de circo Bolla di Sapone de Trent, na escape room endrezèda te na roulotte da circo.

Podedde lejer de più su La Usc stampèda de en vender ai 31 de messèl del 2026


 (MCI/TZ)