La Usc di Ladins

Con i 15 de messèl se pel fèr domana per l assegn de natalità metù en esser da la Provinzia de Trent per la families olache nasc o vegn adotà n terz fi. Chesta desposizion perveit na quota fissa paèda fora te diesc egn, aldò de la situazion economica de la familia e na quota premie per engaissèr la mères a jir endò e restèr a lurèr. N didament spezifich pissà per conjobièr natalità, lurier e bonstèr de la familia. Anter i requisic vegn domanà che la mère abie n lurier canche la compra o tel moment de l’adozion opura che l’abie paà ite i contribuc previdenzièi per amancol 12 meisc, ence no a do a do, ti ultimes cinch egn. Con i mudamenc neves aproé da la jonta la prozedures les é più scempies: l é stat smaorà i termins per portèr dant la domanes che ades rua fin a 180 dis dal nasciment o da l’adozion del fi e chest an vèl ence la desposizion transitories che vel dir che per i bec nasciui o adoté dant dai 30 de jugn 2026 la domana de la quota fissa la pel vegnir fata dant dai 31 de dezember e vegn paà fora duc i meisc passé. La domana pel vegnir fata da la mère online con SPID o con CIE.