La Usc di Ladins

I 14 de messèl l é na data emportanta per tropes. No demò per la Franzia e, coche saon, per i ladins, che dal 1946 revendichea te chest dì sia unità, ma ence per la Magnifica Comunità de Fiem. Chesta storica istituzion che va sorafora i confins de Fiem tolan ite ence Moena e ruan fin a Trodena, recorda te chesta data l cedean de la sotscrizion di »Patti Ghebardini«: defat ai 14 de messèl del 1111 l Prinz Piscop Gebardo ge à recognosciù a la Comunità de Fiem deric e autonomia. 
Apontin en mèrtesc ai 14 de messèl tel bel Salament Clesian del Palaz de la Magnifica Comunità fora Ciavaleis l é stat metù a jir la seconda edizion de la »Giornata dei Meriti di Comunità«, n event envià via l an passà dal Scarie Mauro Gilmozzi per ge dèr merit a la persones che con sie empegn à didà a stravardèr la memoria, fèr crescer la cultura e valorisèr l teritorie de la comunanza.
Prejentà dal conservator de la Magnifica, l moenat Roberto Daprà, l responsabol di archivies Tommaso Dossi à fat na introduzion storica sul veior document del Piscop Gebardo, ma no l à desmentià de recordèr l'emportanza e l segnificat che la data di 14 de messèl à ence per i ladins, sotrissan la prejenza te sala de desvalives esponenc del mond ladin da Moena e da Fascia.
Anter i premié, defat, l era ence Fabio Chiocchetti, e la motivazion del recognosciment l é stat apontin sie empegn per la cultura e l'identità ladina. Te sia 'laudatio' Daprà à uzà fora Chiocchetti desche una de la fegures de maor emportanza tel panoram de la cultura ladina d'aldidanché.

Podede lejer dut su La Usc stampèda dai 24 de messèl da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (LG)