La Usc di Ladins

L meteo l'aea perveduda e la pievia é ruèda ence te Val Sèn Nicolò, tant en sabeda che en domenia, i doi dis de la Festa ta Mont. Per grazia no l à fat dan desche su per Gardecia o Sèn Pelegrin, e aboncont la é ruèda via per l domesdì, canche bona pèrt del lurier era stat fat e marenes, douces e jeghes, era jà stac belebon desfruté. 
I organisadores, n bel grop de joegn engaissé vidé da Melissa Locatin con vèlch 'decan' del prum grop che seghita a no fèr mencèr sie aiut, i à fat cont che sie ruà ite presciapech 8000 persones demò la domenia, mingol de manco la sabeda, ma l bilanz l é segur positif e i é belebon contenc.
L tema che, desche vigni an, i à pissà de ge proponer a ghesć e fascegn per sporjer apede a magnadiva e entrategniment lijier ence mingol de cultura, l era chel del alpinism. L é stat enjignà na esposizion olache sun 12 gregn tulins scric per fascian, e etres tenc per talian, vegn portà dant mingol de storia de nosc alpinism. A i prejentèr l é stat Franz Detomas e Luciano Calligari, i doi del Comitat che se à cruzià de chesta proponeta.
En cordanza con l tema del alpinism l é stat ence l spetacol metù a jir en sabeda domesdì, sobito do la inaudazion de la mostra, proprio apede ai tulins: l bel projet (S)Legati l é stat pissà, scrit e metù dant dai doi atores Jacopo Bicocchi e Mattia Fabris con la produzion de ATIR Teatro Ringhiera.

Podede lejer dut su La Usc stampèda dai 7 de aost da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Lucia Gross)