La Usc di Ladins

Ai 2 de aost doi smolinamenc emportanc é sozedui te Fascia entorn les cater domesdì. L prum à tout ite la strèda del Pas de Sèn Pelegrin, olache la meta é vegnuda ju tal Fanch: l Socors da mont é stat chiamà per controlèr che nesciugn sie resté sot ite, e per chest la é jita benebon. L trafich é stat desvià envers l Valles, l é stat chiamà ence l jolier per n soralech geologich e i Studafech se à dat ju per vardèr de meter dut a post e poder verjer endodanef la strèda al trafich al più prest possibol.

Presciapech tel medemo moment n auter event amò più pesoch à tout ite l raion de Gardecia, con bisciaboes e giarons smoliné ju sui troes envers l Vaiolet e l Refuge Principe. Chiò i gestores à scomenzà a recuperèr i escurscionisć che vegnia ju dal Gartl. Te pech temp l é ruà su diesc operatores de la sezion de la Val de sot del Socors da mont e etres undesc se à metù a la leta. L é stat menà ju la jent, anter chisc doi ferii lijieres con l'ambulanza da Gardecia ju, e con la colaborazion di Studafech l é jit inant i intervenc per didèr a smendrèr l pericol per la jent e per i socoridores e meter a post che che l era possibol. L intervent é jit inant fin les set da sera e dapò ence l dì do, canche l Socors é jit a recuperèr la persones che era restèdes al Refuge Principe, ajache l troi 584 che da chest rua ja l Vaiolet l é stat dessatà. Vint persones à cognù vegnir portèdes ju fin te Gardecia de gra al intervent del jolier che à fat 5 viajes e de cater operadores del Socors che à lurà da les 10 dadoman fin la does domesdì per ge permeter ai escurscionisć de ruèr de retorn en segureza.
l troi E546 da Gardecia envers l Vaiolet e l troi E584 envers Antermoa é stac seré con na ordenanza del ombolt de Sèn Jan Giulio Florian.

Podede lejer dut su La Usc stampèda dai 7 de aost da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (LG)