La Usc di Ladins

I Studafech de Soraga, Vich, Poza e Mazin é stac alerté ansera, jebia prum de otober, entorn les 9 per n fech crepà fora te na cèsa a Soraga auta, per jir sa Ronch. Sobito l é jit sul post na sessantina de volontadives. Mauro Crepaz, comandant di Studafech de Soraga, ne à dit che i é stac ló duta net, i ultimes é se n jic da les 7 da doman de en vender bonora. »L fech é crepà fora da n cianton jabas enlongia ju ciasa – ne à dit l Comandant Crepaz – e l é jit su per la mantelada de legn de la ciasa, sobito l se à slarià fora a dut l cuert. Aon cognù tirar su dute le tulete e taiar i traves sotite per destudar ju dut e percheche l fech no coe sotite. No se capesc da olache l é pontà via, i é do che i fasc lurieres defora per far n local te tera, podessa esser che l fech sie partì da n cavo, ma no se sà, ades i farà le perizie.« La cèsa la é de na familia de ucrains che no stèsc aló. I é stac chiamé sobito e i é rué sul post con la chieves.  

 (Monica Cigolla)