La Usc di Ladins

Dan otedé s’á desfiré la 10. ediziun dl »Fuga Delicious Trail Dolomiti« – la gara da salté sön munt che porta adöm gastronomia, tradiziun y sport. Da plü de 40 naziuns é gnüs i partezipanc por le »Fuga Delicious Trail Dolomiti«. Ai ê plü co 1.600 a se sfidé sön i trëi percursc desvalis: chël lunch sön 43 km y zirca 3.100 m de deslivel; chël mesan sön na lunghëza de 35 km y 1.900 m de deslivel, y tlafinada le cört, sön 23 km y 1.300 m de deslivel.

Sön le percurs plü lunch n’é sté Luca Pescollderungg da La Ila nia da bate. L’atlet de ciasa ne ti á nia conzedü l’ocajiun ai atri concorënc da rové pormez, arjunjon defata n gran destach y se portan a ciasa la devënta do diesc agn de esperiënza te gares de salté sö por munt y Spartan. Al á taié le travert cun n tëmp de 4 ores, 41 me nüc y 35 secunc.
Defata do l’atlet badiot, é rové al travert le talian Mario Colle, che á stlüt jö le percurs 20 menüc plü tert, y al 3. post é rové le talian Luca Antonioli.
Danter les ëres é stada la taliana Martina Valmassoi la plü asvelta sön le percurs lunch. Al 2. post é rovada la todëscia Eva Kiggen y al 3. post la taliana Elisabetta Gallo de Atletica Cortina.

Por le percurs mesan é piá ia i atlec dales 9:00 da La Ila. I plü stersc é stá Germán Castel Mallen, dala Spagna, cun n tëmp de 3 ores y 30 menüc. Trëdesc menüc dedô é rové do le talian Marco De Meo, rové al 2. post.
Atri dui badioc á arjunt n bun plazamënt: Luca Tiezza (Ski Team Alta Badia) á arjunt le terzo post en classifica cun n tëmp de 3 ores y 52 menüc, tratan che al 4. post é rové Claudio Tiezza, dla Scuola Sci Corvara.

Deplü resultac ciafëise da lí tla ediziun nöia de chësc vëndres, publicada le 2 de otober!