La Usc di Ladins

“I Gardenesi”, chëi de Gherdëina, nscila vëni tlamei: Alex Walpoth, Martin Dejori y Titus Prinoth, i trëi arpizadëures de Urtijëi y gran cumpanies da na vita, che ie cunesciui nia mé tlo ncantëur per si atività d’alpinism. Jì a giaurì vies su per parëies ërc, durmì alauta y sté tla mbracatura ëura alalongia, stajan ora nce plu dis, chësta ie si gran pascion. Si fin prinzipel ne ie nia chël de fé n gran retlam de si jites, ma de viver l crëp salvere y de jì a crì na ndesfideda.

Chëst ann ài abù l unëur de pië do l recunescimënt renumà “Pelmo d’Oro”. L se trata de n pest dat ora dala Provinzia de Belun dal 1998 incà per recunëscer meric tl mond dl alpinism, tla valorisazion dl raion da mont y tla prumozion dla cultura dl luech. N ucajion dla 28ejima edizion dl pest, àn ulù premië propi l trio de Gherdëina per si atività su per i parëies dla Dolomites tla categuria de alpinism n atività. La zeremonia ufiziela ie unida a s’l dé ai 25 de lugio a Ponte nelle Alpi, ala prejënza, danter l auter, dl Presidënt dla Provinzia de Belun. Da liejer tla mutivazion dl recunescimënt iel: “Per l’ezelënza de si atività, per la coerënza straurdinera de si stil y per i valores umans che i trasmët, se cunfermea la curdeda Prinoth, Walpoth y Dejori coche una dla realteies plu mpurtantes y ispiradëures dl alpinism tla Dolomites de al didancuei”.

La sëurandata dl pest ie la drëta ucajion per cunëscer plu da daujin i trëi alpinisć de Gherdëina y si jites. La Usc à audì dui trëi per abiné ora coche i chier ora la vies, ciuldì che i va for a crëp de trëi y sce i l’à nce data su datrai.

Nathalie Stuffer

L articul tla edizion atuela de La Usc di Ladins.