La Usc di Ladins

Doman, en sabeda ai 7 de november da les 16:00 vegn chiamà ite en seconda convocazion la radunanza ordenèra del Grop Ladin da Moena, grop de lurier de paisc de l’Union di Ladins de Fascia che, anter sia ativitèdes, l à la redazion del boletin Nosha Jent che vegn fora cater outes al an.

Do na curta relazion de la presidenta del Grop Angela Chiocchetti del Goti, vegnarà proietà na videointervista a don Elio Sommavilla, a chel che sarà dedicà l nef numer monografich del boletin. Vegnarà dapodò portà dant la neva regoeta de aforismes, framenc e rimes de Tinoto Monech, Valentino Dell’Antonio, un di maores poec de la Ladinia. Sie stil, jà cognosciù te »Do l troi de la speranza«, arbandona la metrica tradizionèla per durèr formes più ledies, che valorisea l ladin con musicalità de forma e intensità de contegnui. Chisc scric, touc ite te »Fiores secrec« e rencuré dal conseier Fabio Chiocchetti, à n valor deldut particolèr tant per l contegnù che per l lengaz, lurà fora de fin per dir ‘valch de più elevà’. L liber vegnarà dat fora debant a duc i sozi de l’Union di Ladins de Fascia e donca l event l é avert a duc. Se podarà do l comprèr ite te senta de la sociazion a Sèn Jan.

L domesdì se serarà su con la litazions del nef Consei (pel litèr duc i sozi da Moena en regola col tesserament), na castagnèda e mingol de musega.