La Usc di Ladins

La Lia per Natura y Usanzes dij stop al trafich su per i jëufs, dantaldut a chi che adrova la stredes di jëufs mé per devertimënt, coche l ie l cajo di auti da garejeda y di motores. Per arjonjer chësc fin à la Lia ulù mëter a jì na azion de prutesta. Perdrët ulova la Lia prutesté bele l ann passà de agost, ma la manifestazion ne fova nia unida data pro cun la muti­vazion che n ëssa strupà su de massa la streda ntan la sajon auta. Chëst iede à la Cuestura dat pro la mani­festazion de prutesta, scebën che l Cumissariat dl guviern ne n’à nia lascià pro de śaré dldut la streda. Nscila se à passa 30 partezipanc y partezipantes ancuntà dala nuef daduman sun Plan de Gralba cun la roda, da ulache n ie furnei de viers dl Jëuf de Sela. Dut chësc ie suzedù n segurëza cun l sustëni de Carabiniers y polizaies de chemun, che à cuntrolà che i auti dovia ne pudësse nia passé dant ala caravana y che i auti dl’autra cursia unisse ancontra plu plan.

Nathalie Stuffer

Dut l articul tla edizion atuela de La Usc di Ladins.