La Usc di Ladins

Le blasun söla granciasa Freieck
Referat cun Giovanni Mischí, ai 12 de jügn tl Museum Ladin Ciastel de Tor
Le Museum Ladin inviëia al referat de Giovanni Mischí dal titul »Le blasun söla granciasa Frei­eck. N iade tla storia de Pico­lin«. Le referat vá ite söl’ im­portanza storica y simbolica dl blasun rapresenté söla falzada dla granciasa Freieck a Picolin. Al cunta dl lian strënt che le blasun á cun la storia dl post y dl fabricat storich. Implü mostrel sciöche le blasun ê n stromënt y na espresciun de podëi, identité y domëne. Le referat vëgn tigní en jöbia, ai 12 de jügn dales 18:00, tl Museum Ladin Ciastel de Tor, l’entrada é debann.

Mostra

• 
•  

View the embedded image gallery online at:
https://www.lausc.it/manifestazions-y-evenc/29661-manifestazions-atuales-speziales#sigProId1fe2adfda7

TO BE A MAN – de Erich Hörtnagl
L Circolo–Lia Mostra d’Ert nvieia de cuer ala giaurida dla mostra fotografica tl self dla lia, ncuei, vënderdi ai 6 de juni, dala 19:00
Dala 20:00 saràl na descuscion cun prejentazion dl liber »To be a man« dl fotograf y reghisser svedesc-austriach Erich Hörtnagl. Alois Schöpf rujenerà cun Peter Demetz y cun l artist.
La fotografies ie usservazions de ëi che fej pert de cultures y ambienc de vita desfrënc, na reprejentazion dla pusciblteies de cie che vester ël y persona possa ulëi dì al didancuei. Ma l ie nce n nvit a rujené y se giamië ora minonghes n con’ di ëi, dla funzions dl’ëila y dl ël y si stereotips. La fotografies ie a blanch y fosch cun sfumadures grijes y si dumbries.
La mostra resterà da udëi nchin ai 29 de juni: merdi – dumënia: 16:00-19:00, de sada y dumënia nce danmesdì, 10:00-12:00.

Festa di 100 agn di Stüdafüch La Ila
Dai 13 ai 15 de jügn vëgnel fat gran festa a La Ila, por recordé le centená di stödafüch dl paisc. Söl program la presentaziun de n liber, na desmostraziun cun les organisaziuns vijines, l’at ofizial y sambëgn tröpa musiga y aurela cörta
I Stüdafüch da La Ila complësc en chësc ann sü pröms 100 agn de vita. Por festejé indortöra le iubilé, gnarál fat trëi dis festa, dai 13 ai 15 de jügn. Le pröm apuntamënt é por en vëndres ai 13 de jügn dales 17:00, tla Ciasa dla Cultura a La Ila, olache al gnará presenté le liber »100 agn Stüdafüch La Ila«, scrit da Daria Valentin. Dedô vára inant cun festa y aurela cörta ala­leria, dales 20:30 cun musiga de Simon Ra­banser y Mac Maya, y spo dales 21:00, canche al gnará impié le füch dla festa.
Festa alaleria y desmostraziun
La sabeda ai 14 de jügn s’incunton a fá festa dlungia la sënta di stödafüch. Dales 10:30 sona la Böhmische da La Ila, dales 11:30 inant cina mesanöt ciafarán spezialités ala grilia y dales 13:00 sona le grup »Aurela Cörta«. Dales 15:00 él söl program na gran desmostraziun deboriada cun i stödafüch di paisc vijins, la Crusc Blancia y l’Aiüt Alpin. Domisdé y da sëra él spo indô musiga dal ví: dales 16:00 cun i »Volxbrass«, dales 18:00 cun »Die Jung Puschtra« y dales 21:00 cun »Die Söhne Tirols«.
Mëssa y at ofizial
L’at ofizial dl iubilé é spo la domënia ai 15 de jügn. Dales 9:00 él te dlijia la santa mëssa da festa y dedô sarál spo l’at ofizial cun i discursc d’ocajiun. Düc é bel inviá da gní a festejé cun i stödafüch.

Yoga por düc
Ai 11 de jügn mët man a La Ila n curs de yoga cun Gabriel Prada
Le Consëi de formaziun Badia mët a jí n curs de »Yoga por düc«, cun Gabriel Prada, te pa­lestra dla scora mesana da La Ila.
Le curs mët man ai 11 de jügn y vá inant por indöt 10 iadi, fina ai 21 d’agost, vigni mercui dales 19:30.
Le yoga é na disciplina nasciüda dan da tröc milesc de agn tl’India. Sëgn é le yoga ince tres plü conesciü chiló da nos, dilan al benefize fisich y mental che al pó porté. Le yoga dëida por ejëmpl te situaziuns de stres y tëma, da trá le fle dërt, al renforza l’autostima, dëida dejintossié le corp, arfera l’invedlamënt, miorëia la flessibilité y l’elastizité. Tl curs gnarál moscedé ite ince le »Animal Flow« – stil ispiré dai movimënc di tiers che se porta la mobilité te n vers dinamich y insëgna da adoré i dërc muscui tl dër momënt, portan cosciënza te zones che i tolun ca dainré tla vita da vignidé. Por informaziuns plü menüdes y prenotaziuns, pón cherdé sö le 347 5877635.

Hubert Kostner – LACORDA02
L Tublà da Nives te Sëlva nvieia ala giaurida dla mostra LaCorda02, n vënderdi ai 6 de juni, dala 18.00
»Sasmujel« dl ann 2019 ie stat l’opra plu pru­vocanta dl artist de Ciastel Hubert Kostner. N crëp de zirca 4x5x6 metri tl giaron dla furcela de Saslonch, fat ite cun 10.500 metri de cordes da jì a crëp.
La mostra »LACORDA02« se taca ite a chësta opra. Ora di tòc de corda dl Sasmujel nàscel dal 2021 incà for inò opres nueves. Tla scultures pierd la cordes si natura flescibla y vën fermedes te posizions statiches, che Kostner cumbinea cun grifs artifiziei, coche n i cunësc dala pa­lestres d’arpizeda.
La ntroduzion ie de Magdalena Messner, diretëura dl Messner Mountain Museum.
La mostra resterà davierta nchin ai 29 de juni, uni di ora che l lunesc, dala 16.00 nchin la 19.00.