La Usc di Ladins

L é n nef endrez che à troà sobito l’aprijiament di organisadores, chel de la UCI Enduro World Cup, che da chest an ge lascia maor ledeza tel endrez de la garejèdes te duc i lesc olache vegnarà metù a jir na tapa del zircuit. L Comitat fascian de endrez, col diretor de gara William Basilico, fort de la cognoscenza del teritorie e de l’esperienza concostèda te 10 egn de garejèdes de aut livel e la creazion del Fassa Bike District, l é do a se dèr ju per desfrutèr al miec i troes de nosc raion conjobian l’endesfida per valorisèr la carateristiches fisiches e tecniches de la disciplina e la beleza del paesaje per ge sporjer a partezipanc e publich la maor emozions. I atles de la World Cup corarà per doi dis, e un dì sarà ence la Enduro Open. A Cianacei l raion de Ciasates sarà dut n busiament col ‘vilaje’ di teams, l’area expo, l maxi scherm per veder la competizions e dut chel che roda entornvia.

L cont di dis che mencia l é jà scomenzà, se pearà via en jebia ai 26 domesdì co la conferenza stampa averta a duc per scutèr la restimonianzes di atlec e se fèr ite sobito te chest mond sportif adrenalinich.