La Usc di Ladins

La neva che l corp de P. Paolo Dall’Oglio fossa stat troà te la Siria, te na fossa vejin a Raqqa, se à slarià fora en prescia al scomenz de chesta setemèna, ressutan dai social a duc i media. Na neva fosc zenza fondament, che aboncont à soscedà denef atenzion e speranzes per l gesuit talian. De el no se sà più nia dai 29 de messèl del 2013 e te duc chisc egn no l é la pruma outa che vegn fora neves che no à confermes. L retroament de sie corp se porta do, da na man, l dolor per la conferma de la mort de chesta persona straordenèra, da l’autra la segureza e l met de ge dèr na sepoltura: de fat, la speranza che l sie amò vif la é dassen fiegola.
Testamonech spezièl de pèsc, de fe e de amor tel respet de duc, Dall’Oglio se à tras dat ju per l dialogh anter la religions e en particolèr per la convivenza anter cristiegn e musulmegn. L à metù su la comunità monastica ecumenica de Deir Mar Musa te la Siria e l lurèa per n projet de democrazia te chel Paisc, ma dò 30 egn, tel meis de jugn del 2012 l aea cognù se n jir per la prescions del goern de Bashar Al Assad e l era vegnù de retorn te la Tèlia. Doi meisc do l era ruà ence te Fascia: ai 26 de aost l aea tout pèrt a la Festa de Lifeline Dolomites col dotor Carlo Spagnolli e a Poza te gejia de Poza l aea fat na perdicia che aea tocià l cher. »Volesse poder rejonèr ladin – l aea dit al scomenz – l lengaz de la jent de chesta tera, che gé no chiamasse mendranza, ajache no conta esser maoranza, no conta jir do a la massa per chierir l’aproazion, ma testimonièr l giust, ence canche no l é sorì.«
Paroles che el à metù en pratega co la coerenza vivuda e paèda en pruma persona.

Se pel lejer dut su La Usc nr 21 dai 6 de jugn: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Lucia Gross)