La Usc di Ladins

Pra na mëisa turonda se àl ancuntà esperc per rujené dla malaties psichiches, n argumënt che ie – nce sce al didancuei iel n fat che truepa persones ie tuchedes da una o l’autra – for mo n tabù. Ntëur ala mëisa ite se àl sentà l dutor de basa dr. Simon Kostner, l presidënt dla lia Ariadne Günther Plaickner, dr. Alberto Degiorgis, psichiater y psicoterapeut. Ënghe prejënc cun testemunianzes persuneles fova Hannelore Insam, Andreas Delago y Julian Stuffer. Tres la sëira àl menà Stefano Zanotti.
L se tratova de na sëira de nfur­mazion n con’ de na tematica che vën mo massa suvënz schiveda: la malaties psichiches. L fin fova chël de giaurì na lerch de dialogh n con’ de na realtà che, scebën che la reverda truepa jënt, ie for mo ncertleda da chiet y stigma. L ie unit adalerch truepa persones, tantes che la sala de prejentazion fova tocia y plëina y che la jënt fova monce senteda tla sala daujin nchin belau pra porta. N à udù che l ie na tematica che nteressa, che ie relevanta y che toca segurmënter nce trueps, povester nia diretamënter, ma ndiretamënter.