La Usc di Ladins

En domënia ai 24 de ma él gnü a s’al dé na burta desgrazia. Döes compagnes jones dal’Emilia Romagna ê jüdes a fá la via ferada de Pisciadú, mo sön le tru da gní zoruch devers dla Val Mesdí s’áres falé tru. La jona Elena Berselli de 23 agn jô danfora, canche ara é slisorada, toman jö por 150 metri. An mina che les jones s’ais falé, ciodiche ares ti jô do a na cherta sön le fonin, che podess les avëi porté demez dala dërta sëmena. Co che ara é spo gnüda a s’al dé, n’él nia meso da dí avisa, ajache la jona ê impó n toch danfora respet a süa compagna, che ti jô do. 
Chëst’ ultima é rovada pro le corp de Elena tl canalun, olache ara é instëssa slisorada y s’á fat me, por fortüna te na manira lisiera. Al ê incër les 19:30 canche ara á da dé l’alarm; ajache al n’ê nia rëi, ára cherdé aiüt tres n coliamënt al signal de satelit cun n telefon de ultima generaziun. Por i socoridus dl Aiüt Alpinisć Alta Badia n’él nia atira sté meso da ciafé sö le post dl inzidënt, cina che ai n’á odü n signal de löm tla sfëssa scöra dl canalun.
I socoridus é gnüs lasciá jö söl post dal joler Pelikan 3, te n intervënt che é ince sté tecnicamënter compliché. Por Elena Berselli n’él indere plü sté nia da nen fá: ara é bele morta söl post por gauja dles gran ferides y dles botes che ara s’á ciafé tla tomada. So corp zënza vita é gnü condüt te capela da Corvara. Sön le post é rová ince l’assistënza spirituala y i Carabiniers de Corvara. (mo)