La Usc di Ladins

Le "coronavirus" á lascé na merscia sota te nosta vita: soziala, economica, familiara, tl vignidé. Do la esperiënza sota dl lockdown, nen vára sëgn da imparé da vire zacó cun le virus. Y chësc nes damana a düc nos n sforz por tigní ite comportamënc che pó smendrí la probailité da s’l taché, mo ince da le dé inant. Ai gragn él saurí da ti al dí, mo co pón pa ti splighé ai mëndri che al é miú sce ai tos tl comedun, che ai dess se lavé plü gonot les mans, che al vá forsc ince debojëgn da tó n mascherot te certes situaziuns?
N aiüt y valgünes respostes ciafon sëgn te na publicaziun nöia, dada fora dal Istitut Ladin Micurá de Rü, en colaboraziun cun la Cooperativa Casa Bimbo Tagesmutter. Ara se trata de "Covidino e Lara", n liber dessigné che á le fin da ti splighé ai mëndri te na manira ligherzina la situaziun de convivënza cun le coronavirus y dé impulsc por la afronté. I tesć é gnüs metüs adöm da n team de 9 pedagoghes y pedagogs de "Casa Bimbo Tagesmutter", i dessëgns é de Elisa Obwegs da San Ciascian.

Deplü ciafëise t’La Usc di Ladins di 4 de setëmber  (pablo)