La Usc di Ladins

D’aisciöda odô esperc dl setur danfora n rebas dl 50% tla venüda de alimentars y produc te nostes piceres botëghes tla Val Badia, mo al é sté prognoses che ne s’á por fortüna nia plü verifihcé. Alex Rottonara: "Düc i seturs tl comerz local á lauré bun, scebëgn che la sajun da d’isté á metü man dorata tert respet ai ultimi agn." Val’ botëga dal patüc da mangé á cinamai lauré miú tla spana de tëmp dla geran stlüta, chësc a gauja dles proibiziuns parziales da se möie te d’atri comuns y por le fat che les ostaries ê stlütes.
Alex Rottonara ciara danfora ala sajun da d’invern: "Por la sajun da d’invern él da s’aspeté manco sciori da fora dla Talia, porchël messarunse tigní cunt de n rebas tles venüdes y tl davagn." La Lia dl comerz y di sorvisc südtiroleja á ince rengrazié la popolaziun dl post por avëi tigní la crëta ales botëghes y ince ai sorvisc, respetan ince les restriziuns anti coronavirus. Nüsc paisc é en vita de por de dantadöt por les botëghes, la gastronomia y i sorvisc desferënc profescionai che vëgn pitá söl post.  (Iaco Rigo)