La Usc di Ladins

La Wikipedia Ladina é nasciüda ofizialmënter ai 17 d’agost 2020, canche ara é jüda fora dal incubator do che le Comité Internazional di Lingac l’â reconesciü ai 13 de messé 2020. Do prësc trëi agn de laur él sëgn ince na Wikipedia por Ladin ti idioms desvalis, reconesciüda a livel internazional. 
Le proiet é gnü coordiné dala colaboradëssa dla Repartiziun Scora y Cultura Ladina Susy Rottonara y porté inant adöm cun i mëmbri dl comité de sostëgn, le scritur Roland Verra y Gian Francesco Esposito, esponënt dl diretif de Wikimedia Italia. Al svilup di contignüs ál contribuí ince volontars dales valades ladines y por la pert tecnica ince esperc da defora, cun plü co 400 anuzadus registrá.
Paralelamënter al svilup dla Wikipedia Ladina él ince gnü porté inant n ater proiet che toca pro l’organisaziun tët de Wikimedia cun la biblioteca digitala por ladin de Wikisource, te chëra che al é gnü ciarié cënc de tesć storizisá por ladin, de chi che al é gnü fat i links tles plates corespondëntes che trata auturs ladins tla Wikipedia Ladina.
Na Wikipedia Ladina strotorada y autonoma a livel paritar respet ai atri lingac á na gran valüta y adoranza por sostigní n lingaz de mendranza, dantadöt aladó dla gran visibilité che i contignüs por ladin y en cunt dla cultura ladina ciafa tres la presënza te Wikipedia. Le portal de Wikipedia é la enziclopedia digitala plü adorada al monn y é n referimënt fondamental por la documentaziun en cunt de vigni ciamp dl savëi. Porchël ti dá la Wikipedia Ladina n gran prestisc al lingaz y ala cultura ladina a livel mondial y porta pro – de fat – a süa conscideraziun, valorisaziun y sconanza.

 (Iaco Rigo)