La Usc di Ladins

Ince i paurs de Mareo á indô condüt i tiers de munt. Dan chinescdé ési gnüs mená da Senes, Fodara Vedla, Fanes y Fojedöra jö. Cotan de tiers é spo ciamó stá n’edema sön les pastöres dla Val dai Tamersc, mo oramai menâi do da jí a ciasa. En sabeda dan otedé éra stada tan inant, olache valgügn paurs de Senes y Fodara Vedla á orü organisé le gní de munt. Bele da doman é famëis y paurs rová tla Val por abiné adöm i tiers, denanche se mëte sön tru cuntra Ciamaor, olache al é gnü fat na palsa. Defata do misdé ési spo piá fora por lascé rondení te paisc tlunches y bronsines. La sajun sön Senes y Fodara é jüda bun, tiers y porsones é jö sagns intun, porchël ái ince podü gní cun la vacia dala gherlanda. Por la munt de Senes él gnü inforní na vacia de Martin Clement dl Lü de Crëpa sö Ju/ Picolin, por Fodara Vedla án inforní na vacia de Deborah Ellecosta dl Lü dal Sartú a Rara. Pro i famëis che á ciaré di tiers te munt n’êl iniann ince n nü: le jonn Nicola Pagan d’Al Plan, che á por le pröm iade fat l’esperiënza da vardé i tiers sön Fodara Vedla. Le de denanche jí a ciasa unse albü l’ocajiun da s’la cunté impara y ti damané co che ara ti á buté.

La intervista impara podëise lí t’La Usc di Ladins dl 1. d’otober





 (pablo)