La Usc di Ladins

La pandemia á condizioné dassënn la vita de tröpes uniuns. Al é sté dui agn olache i ne podôn nia cis se incunté, sté deboriada y insciö á tröc y tröpes ince dé sö süa ativité tles lies di paisc. Mo sëgn s'intënon che al é indô n pü' döt cant che pëia ia. Conzerc, teatri y manifestaziuns de vigni sort él sön le program fora por l'altonn. Do da dui agn de limitaziuns á ince indô metü man l'ativité dla Uniun Bal Popolar, che chir balarins y balarines, deache – sciöche la presidënta Sarah Alfreider nes cunta – n'él deplü che á lascé propi tratan le Covid. L'Uniun Bal Popolar, che ê gnüda metüda sö dl 1985 da Adalbert Piccolruaz de Badia y Bruno Pizzinini da La Ila, á bele tl pröm messü afronté val' dificolté por ciafé n diretur de bal y un che sonass i orghi. Cun l'aiüt de Hilda Pizzinini, che ê chi agn a ce dla ULVB, él gnü pro la uniun Toni Senoner da Gherdëna, che fajô bele pert de n grup de bal, y Lois Kastlunger da Pliscia che insignâ chi agn te scora y che savô da soné i orghi da botuns. La pröma esibiziun é bele garatada d'aisciöda dl 1985 y spo á la Uniun metü man da se lascé odëi tres deplü dan le publich, ince en colaboraziun cun les Assoziaziuns Turistiches, y ai gnô dër aprijá dantadöt dai ghesć. Insciö é le balé popolar – che n'ê pordërt nia usanza te nosta valada – gnü na tradiziun te nüsc paisc, na tradiziun che ne dess nia jí sot, sciöche la presidënta alza fora. Nos l'un incuntada y ti un fat n valgönes domandes.

L'intervista podëise lí tla ediziun da en vëndres ai 11 de novëmber. 


 (kp)