La Usc di Ladins

L concurs anter les artistes y i artisć, dla y tla Ladinia, per cherì na opera d’ert da ti sourandé sciche onoranza per l’opus vitae a na pesonalité ladina proponuda dal Ressort ladin per la scola y la cultura dla Provinzia de Bulsan, dai Istituc Ladins, dal Museum Ladin y da la »catedra ladina« dla Université Ladina da Bulsan à arjont na gran resposta: ben 32 artistes y artisć à mené ite si laours per nen propone un sciche Pest per la personalité ladina (dl valour de 7.000,00 Euro). La giuria é steda metuda adum da Katharina Moling (diretoura dl Museum Ladin de Tor), Aron Demetz (union La Vëta), Iaco Rigo (EPL-Ert por i Ladins), Alexander Zoeggeler (SKB-Südtiroler Künstlerbund) y Eva Gratl (critica d’ert y vizepresidenta dl SKB-Südtiroler Künstlerbund). 
Per la giuria n’é le vare da cherì fora l laour plu adaté per i pest da i sour­an­dé a na personalité ladina nia sté saurì. L diretour dl Ressort dla formazion y cultura ladina a Bulsan André Comploi, che é l ideadour dl concurs »Ert X Merit« y dla »Onoran­za a na personanlité ladina«, s’à do la analisa sota y valutazion arjonta dla giuria desmostré dret content dantaldut con la gran partezipazion de artistes y artisć al concurs y con l bon contegnù creatif prejenté, y s’à complimenté con l artist Gregor Prugger per si bon laour y l pest che al podarà pié do.