La Usc di Ladins

La 39ejima ediziun dla Maratona ó mëte n sëgn y deventé simbol de solidarieté, de condivijiun y de pesc. Chëstes nasc dai pici gesć, sciöche chël da se daidé un cun l’ater canche an sbüj, druché söi pedai deboriada sön la trata plü ërta y partí n percurs cun valgügn che an ne conësc nia. Ince sce le davagnadú é un su, inviëia la roda ala condivijiun.

»La Maratona é l’incrujada danter mile y mile de stories«­ dij Michil Costa. Insciö s’intravaiëia ince i corusc dl logo nü, dessigné da Manuel Bottazzo, che dess recordé chi dla bandira dla pesc, che s’á te chisc tëmps scartacé. Les risses busiëntes trasmët la »confujiun, la fujiun y le caos«, che abitëia le monn y ciafa lerch ince tla porsona. La scrita vá indalater y rapresentëia n momënt de despartiziun soziala y politica. Ara dess ester n invit ala colaboraziun por la »Pesc, Pax«.

I posć é indô limitá a 8 mile, iniann indere cun na novité: plü posć gnará dá ia ales ëres, cun le travert da arjunje n 15% de partezipaziun fe­minila. Cun i 8 d’otober él pié ia les iscriziuns online, che sará davertes cina al 4 de novëmber. Lapró sarál meso cun chësta iscriziun da cumpré le pachet che stlüj ite l’iscriziun al evënt y le pernotamënt te hotí dl post. Na pert de chi che se scri ite te chësta spana de tëmp, partezipará ala trata ala niza, che se desfirará do la fasa dles prenotaziuns.



Deplü da lí ciafëise tla ediziun nöia de vëndres, ai 10 d'otober!