La Usc di Ladins

Siur Robert Sottara é sté indöt 30 agn miscionar tl Brasil, i ultims agn a Serra, na cité cun 521.000 abitanc a nord de Vitória, la capitala dl’Espírito Santo. Vitória, 530 km a nord–ost de Rio de Janeiro, söl mer, cun sënta dl vësco, é conesciüda sciöche cité cun na gran criminalité, ciamó plü alta co a São Paulo y Rio. A Serra él 19 ploanies, y siur Robert ê ploan de São José Operário – na ploania cun plü co 50 mile abitanc y 10 comunités, vignöna cun süa dlijia.
Al ê tl 2017 canche siur Robert â odü la gran nezescité da costruí tla comunité Nossa Senhora da Paz na strotöra, olache i mituns y jogn podô se incunté por la catechesa. La pastorala de chisc ti stê dër a cör. La formaziun religiosa gnô fata te dlijia, olache al n’ê degüna poscibilité da jí te n WC o da sté adöm a mangé y bëre val’. Insciö á siur Robert, en colaboraziun cun le consëi de ploania, y cun l’aiüt dles spënores che al ciafâ dal’Europa, cumpré terac y á invié ia tl 2018 la costruziun, che jô plan inant.
Intratan él gnü le Covid che á tigní sö döt. Tl 2023 á siur Robert messü lascé la misciun por motifs de sanité, y i laurs é stá chic, ince por mancianza de scioldi y dl interes di miscionars che â surantut la ploania, olache al é sté de plü cambiamënc te cört tëmp. Deache chësc zënter ê n proiet che ti stê dër a cör a siur Robert, unse tut sö contat cun valgünes persones dl consëi de ploania, y i un porvé da fá rové la costruziun y garantí le finanziamënt.

Deplü nes cunta Albina Sottara, t’La Usc di Ladins di 28 de novëmber