La Usc di Ladins

Al é sté le Ski Team Alta Badia che á albü l’inciaria da organisé, en sabeda dan otedé, la secunda tapa dla "Copa di Mituns", sciöche an l’â odüda otedé denant a Tasten. I mëndri dles categories di "cuccioli", che gnô da döta la provinzia, s’á mosoré te n skicross sön la pista "Bioc". Sön podest él rové atletes y atlec badioc, maroi y gherdënes. Dui podesć é gnüs adaldé tla U11 di mituns, olache Andy Erlacher dl SC Al Plan á arjunt le 2. post cun 55.19, tardí de ma 14 centejims da Fabian Pichler dl ASC Eggen. Y de 14 centejims ê ince le destach danter Erlacher y David Schäfer dl ST Alta Badia, che é insciö gnü terzo cun le tëmp de 55.33. Arjënt y brom ladins ince tla U12 di mituns, olache Mattia Valentini dl ST Alta Badia é gnü 2. cun 54.33, tratan che David Prinoth dl SC Gherdëina á arjunt le 3. post cun 54.95. Medaia d’arjënt ince por Ellen Alfarei dl ST Alta Badia tla U12 dles mitans, cun le tëmp de 55,26. Cun les prestaziuns de sü atlec, á le ST Alta Badia davagná pro la classifica dles scuadres cun 333 punc, tratan che le SC Gherdëina é gnü terzo cun 240, le SC Al Plan cuarto cun 197 punc.  (pablo)