La Usc di Ladins

Presciapüch dan da n ann ti ciarâ le Consëi comunal te süa ultima sentada dla legislatöra al proiet ese­cutif dla Ciasa Jan Batista Runcher. Cun chësc proiet rovâ a piz la legi­slatöra dl ombolt Iaco Frenademetz, che â acompagné la proietaziun de gre en gre ti ultims 10 agn. En chël de á le proiet ciafé l’apro­vaziun di mëmbri dl Consëi, scebëgn che val’ osservaziun critica devers dl stüde y dl cost ais acompagné la discusciun.

Ai 23 de merz é piá ia ofizialmënter i laurs por l’ampliamënt ala strotöra che ti dá adassosta a deplü uniuns de paisc y che ospitëia le laur de volontariat en ocajiun de festes y manifestaziuns de vigni sort. Pian ia dai conzerc dla Scora de Musiga cina ai maius evënc sciöche le Rait de San Linert o la Maratona dles Dolomites: tla ciasa dles uniun él tresfora gran büsia. Ara se trata porchël de n proiet important y che reverda danta­döt la comunité.

»Les uniuns che anuzëia la ciasa é plü co 17, danter chëres che á la sënta te ciasa y chëres che röia te ciasa por mëte a ji manifestaziuns. I baiun de na strotöra che vá a sostegní l’ativité dles uniuns, le monn dl volontariat y insciö ince le bëgn dla comunité«, dij l’assessur comunal Elvis Burchia, che ti é sté do al proiet ti ultims agn.


Deplü sön le proiet podëise lí tla ediziun nöia, publicada ai 27 de merz dl 2026!