La Usc di Ladins

Ci nes liëia pa deplü a nüsc amisc? Forsc la cherdënza che i i conesciun miú co düc i atri y che a se tigní adöm é dantadöt la sinzirité. »I se conesciun da na vita y i se dijun döt. I ne un pö degügn socrëc« pê gonot la plü gran detlaraziun y conferma de n raport sterch, sides danter amisc co danter partners. Mo sti­menëiel? O orunse ma nes dé forza cun chësc pinsier por ne messëi nia ti ciaré ti ödli ala verité: che ince les relaziuns cun les raisc plü sotes pó bandoré cun n sofl de vënt y se gracé da n momënt al ater. Val’ iade bastel n messaje lit dadalt o na telefonada, ascutada dala porsona falada. Ince na cëna scëmpla danter amisc pó a chësta moda tó na ota daldöt nia aspetada y chësc, döt ma por colpa de n jüch, metü forsc man cun lisirëza y na porziun de coriosité. Les conse­guënzes pó ciafé sfomadöres drama­tiches y pó mudé daldöt la fin dl copiun.

Le toch teatral »Le Jüch«, cun scenografia de Ursula Tavella y regia de Matteo Rubatscher, é na rapresentaziun de ci che al podess sozed te na te situaziun. Sön pala­dina jará i mëmbri dl’Uniun Teater La Val cun le toch ciamó trëi iadi: en sabeda ai 28, domënia ai 29 y mertesc ai 31 de merz - l’ultim apuntamënt é gnü injunté ciamó surapró.

Deplü da lí ciafëise tla ediziun nöia publicada le vëndres ai 27 de merz!