La Usc di Ladins

Por i sonadus de orghi da man él deplü apuntamënc olache ai pó mostré y mosoré so förtl da soné. Un de chisc é le campionat nazional austriach, che vëgn a s’al dé vigni ann y olache ince chi de Südtirol pó tó pert. N scalin plü insö é le campionat mondial, che gareta ma vigni dui agn. L’ultim iade che i dui evënc é rová te Südtirol êl dl 2009 a Sterzing. Iniann, dai 4 ai 7 de jügn, él le paisc d’Al Plan che á le plajëi y l’onur da ti dé alberch. Al é insciö le pröm iade che i campionac röia sön terac ladin. An pó bëgn dí che Al Plan sará cater dis alalungia tles ciafes di orghi da man. Danter campionac austriacs y campionac dl monn vëgnel alerch cënc de sonadus da döt le raiun dles Alpes y ince surafora. Sce ara é garatada da i porté chiló da nos, él mirit dl maester de orghi Eduard Huber da Peraforada che é bele da cotan d’agn tles juries, y ince dla Cooperativa Turistica Al Plan/San Martin, che á azeté da surantó l’organisaziun y la logistica. I se l’un ciacolada cun Eduard Huber, che nes á cunté plü avisa ci che i podun s’aspeté.

T’La Usc di Ladins podëise lí na intervista cun Eduard Huber, y öna cun Carlo Runggaldier – diretur dla Cooperativa Turistica Al Plan/San Martin, che surantol gran pert dl’organisaziun y logistica.  (pablo)