La Usc di Ladins

A Al Plan él dal 1996 incá che al vëgn trat ite – ti mëisc da d’isté – n daz por l’azes ala Val dai Tamersc y Pederü. Tl pröm ê la stangia daite da Lé dla Crëda, i ultims agn ésera stada ite a Fodara Masaronn. Cun chësc ann dess se mudé döt. Le Comun de Mareo spostará la stangia plü infora, atira sura le ciamp dal sport tla localité Ciamaor, y l’azes sará da paié vigni de, döt l’ann, de y nöt. Al gnará metü sö n sistem automatich che lí les targhes di auti, n pü’ sciöche al é ite en Braies, y por l’azes él tarifes desvalies – aladô dl meso y cun desfarënzies danter isté y le rest dl ann. Cun chëra che al é da paié l’azes, ne sarál nia plü da paié la plaza da parché a Pederü. Chësc é en cört ci che la Junta marora á fat fora tla sentada ai 15 d’aurí.

Abonamënt por i residënc
I residënc tl comun de Mareo á la poscibilité da fá n abonamënt anual che costa 25,00€ y che é lié ala targa dl auto. Sce un ó ite cun dui auti, mëssel fá dui abonamënc. Debann pó jí chi che abitëia ite por la Val, i patruns dles strotöres tl parch, chi che laora, i liferanc y sambëgn la proteziun zivila, sciöche ince paurs che á ciampoprá da lauré y che ciafará porchël n azes debann ince por les mascins da laur. N abonamënt pó fá ince i imprëstaauti che laora tl comun (NCC), tratan che chi da foradecá paia vigni iade. Por düc i atri – tan co ghesć y ince jënt da d’atri comuns – él tarifes che se müda aladô dl meso, aladô dl orar y ince aladô dla sajun. 
Y por i "campers salvari" che stá suranöt ite por la Val, vëgnera dër cera.

Deplü ves dijunse t’La Usc di Ladins di 24 de aurí, olache i un ince baié cun le vizeombolt Paul Pisching  (pablo)