La Usc di Ladins

I trapoluns é tres al laur y an mëss dí che ai s’un stüdia tres de nöies. Sëgn ési bogn da telefoné y te fá gní sö le numer de istituziuns, cinamai forzes dl ordinn, che esist por davëi. Y döt chësc aumentëia la credibilité. Ma öna na cossa ái düc deboriada, che ai ó avëi i scioldi de süa "vitima". O che ai damana diretamënter da mené scioldi, o che ai damana da dé ite dac de azes al online banking o dac dla cherta de credit, o che ai damana da druché sön n link o telefoné a n numer.

Tl pröm m’âi fat demorvëia, canche i ciafâ instës n messaje che al ê gnü damané n’autorisaziun da trá jö 2.100,00€. Ofizialmënter a inom dla "NEXI", che gestësc les chertes de credit y ince chëres de debit. Tl messaje gnôl ince spezifiché "Sce te n’es nia tö sté, contatëia le sorvisc cliënc al ......". Iö n’á no respognü, y no telefoné zoruch a chël numer, deache oramai ái aldí tan de iadi de chësc sistem che i ne sun nia tomé ite. Por na sigüda ái mefo impó telefoné ala "Nexi", mo tolon ca le dër numer che é sön le portal ofizial, olache ai m’á ince assiguré che al n’ê gnü trat jö nia.

Mai dé ite üsc dac personai
Sciöche banches, sozietés de chertes de credit, mo ince forzes dl ordin recorda tres indô, ëi ne ves damanará MAI da dé ite tl telefon üsc dac dla cherta, le codesc PIN, passwords o azesc al cunt bancar online. Y chësc ne desses gnanca mai fá, desche sce i le fajëis, podessel ala snela gní trat jö scioldi, a chi che i podëis spo ma plü ti ciaré do. Sce al ves vëgn n messaje che al vëgn trat jö scioldi y ne ëis nia os cumpré valch, spo telefonede a osta banca o ala sozieté dla cherta, mo verifichede le numer sön sü portai ofiziai. N’orede tó le numer che é tl messaje trapolun. Chël fej pert dla furbaria. Ojesse a osta istituziun o a osc consulënt de crëta. Y sce al ves sozedess che i gnëis trapolá, n’orede ves dodé, mo jide a le dé dant.  (pablo)