La Usc di Ladins

Dan da 15 agn gnôl inaudé la sënta secundara dl Museum Ladin a San Ciascian, chëra dedicada ala laurs dl Conturines. La mostra de »Ursus ladinicus« porta adöm cotan de osc y d’atri reperc descuris dl 1987 da Willy Costamoling da Corvara. Ara ne presentëia nia ma na recostruziun dl ander y dl ambiënt te chël che la laurs ladina á vit dan da 60 mile agn, mo ara alza fora les particolarités geologiches dl raiun dolomitich y les coriosités dl habitat natural.
Da merz incá é l’ander dl Conturines gnü nominé l’ander plü vedl dles Alpes. Aladô dles ultimes inrescides geologiches presentades a Balsan ala fin de merz, él gnü fat na dataziun dl ander che vá zoruch a cuaji 6 miliuns de agn; na descurida che valorisëia ciamó deplü l’esposiziun dl museum »Ursus ladinicus«.

Propi en tëmp por la festa di 15 agn dla sënta, él gnü a s’al dé n’atra descurida sensazionala, a chëra che al ti é gnü dediché na seziun nöia. Tla serada de festa en vëndres ai 5 de jügn á i colaboradus dl museum deboriada ales autorités, ai surastanc y ai mëmbri dla comunité, lascé tomé le slaier che stopâ la vidrina nöia. I dui reperc dla seziun injuntada é gnüs presentá dal paleontologh y colaboradú scientifich Herwig Prinoth. Da sëgn inant pó i dui corgn d’alc gní descuris dal publich tla sënta a San Ciascian.


Liede deplü sön la seziun nöia tla ediziun nöia da en vëndres ai 12 de jügn!