La Usc di Ladins

Ince sce i sun bel amez isté, tochera da baié de raiuns dai schi, deache al é da püch gnü fora i resultac dl stüde "Best Ski Resort", olache l'Alta Badia se confermëia danter les destinaziuns da jí cun i schi plü aprijades de döt le raiun dles Alpes. La inrescida é gnüda fata tratan l’invern 2025/26 y é gnüda desfirada dala impreja Mountain Management Consulting, en colaboraziun cun l'Université da Desproch,. Döt adöm él gnü tut ite passa 41.000 schiadus y snowboarder te 49 destinaziuns da jí cun i schi dles Alpes. Les porsones é gnüdes intervistades diretamënter tl raiun dai schi, dantadöt tles üties y sön pista.
Le pröm post i é jü a Zermatt, che á arjunt indöt 8,48 punc. Les atres posiziuns "da podest" röia dötes tla Francia, cun le secundo post de Val d’Isère (8,40 punc), y le terzo post ala per cun Les Arcs y Tignes (8,31 punc). Toch iadedô se plazëia spo l’Alta Badia, che á ma 0,03 punc demanco. Cun n resultat de 8,28 punc é le raiun badiot rové al 5. post tles Alpes y al pröm post tla Talia. "N reconescimënt particolarmënter significatif, deach'al nasc diretamënter dal'esperiënza di vijitadus, che á valuté deplü aspec dla vacanza sön la nëi: la cualité dl raiun da jí cun i schi, l’ospitalité, i sorvisc, la restoraziun, les infrastrotöres, la segurëza, le raport danter cualité y prisc, y la sodesfaziun complessiva", scrí Alta Badia Brand (ABB) te n comunicat. 

Deplü sön chësc resultat y ince les posiziuns dles localités ladines vijines, podëise lí t’La Usc di Ladins di 14 d’agost