La Usc di Ladins

Tl cheder dl plann por la mobilité cun la roda fat dala Provinzia de Balsan por i agn 2022-2030, s’á taché ite deplü valades a livel de Südtirol por lauré fora raiuns funzionai ala roda (RFE – Radfunktionelle Einheiten, ndr). N plann che á sburlé do al svilup dla rëi di trus dla roda injuntan percursc y infrastrotöres nöies por arjunje na mobilité plü sostignibla te döta la regiun. Ince l’Alta Badia é un di raiuns interessá.
Sön la trassa y sön les carateristiches dl tru dla roda n’éra cina sëgn mai gnüda da se gní. Porchël é ince l’ultim proiet, chël lauré fora dl 2022, gnü lascé tomé t’ega y da dailó nia plü gnü atoché. Le proiet resta chît tratan che le debojëgn crësc y les rodes aumënta sön strades y söi trus.

»Sön la lista di trus dla roda da finanzié da pert dla Comunité Comprensoriala é chël dl Comun de Badia scialdi doía, deache i ún albü bindebó dî da aprové le pröm proiet te Consëi y deache al nes mancia ciamó la proprieté di grunc por la realisaziun dl tru dla roda. I dac nes dij che vigni ann vëgnel tres plü jënt cun la roda y les strades é tres plü suraciariades de trafich. Al n’é nia n fatur da tó ala lisiera sce an ti ciara spo al numer di inzidënc che vëgn a s’al dé sön strada danter veicui y ziclisć te döta la Talia. Al é n debojëgn da podëi garantí deplü segurëza.«, é la minunga dl vize-ombolt dl comun de Badia Werner Pescosta.


Deplü da lí ciafëise tla ediziun nöia de vëndres ai 14 d’agost!