Laota êl normal che la liënda dl Rëgn de Fanes gniss ince cuntada te scora. Incö n’ésera nia plü insciö, mo al é porchël tres indô sté iniziatives originales por ti dé plü vita y visibilité. I ponsi p. ej. al film »Le Rëgn de Fanes« sot la regia de Roland Verra dan da 20 agn, o al comic »L Regn de Fanes« dé fora dl 2019 por interessamënt de Zeno Kastlunger. Intratan él les istituziuns ladines che se dá jö cun les liëndes a livel scientifich y al é cinamai gnü avié le prozes por le reconescimënt dles liëndes sciöche patrimone imaterial dl UNE SCO. La Provinzia á bele mené a Roma le dossier, metü adöm cun le sostëgn dl espert y professur Pier Luigi Petrillo. Chisc agn él ince la Cooperativa Turistica Al Plan/
San Martin che s’á scrit la liënda sön süa bandira y á fat de »Le Rëgn de Fanes« na sort de merscia, cherian danterater n gröm de gadgets, che ciafa so aprijamënt: socheni, copes dal cafe, magnec da taché sö y tan d’ater. Mo ci che an á sëgn te fana, é de döt n’atra mosöra. I baiun de n gran proiet che gnará porté inant dala Cooperativa de comunité »Por Mareo« y dala Cooperativa Turistica. Söl program él da ti dé na iesta daldöt nöia ala defilada dles liëndes, che gnará desfirada en gaujiun dl "Festival dles Liondes" ai 12 de setëmber dl 2027. Chiló s’án lascé sön le förtl dl fashion designer Fernan Carlos "Ferdy". Le secundo pilaster é le renovamënt dl "Tru dles Liondes" y le terzo la composiziun de na opera por orchestra.
Deplü ves dijunse t’La Usc di Ladins di 21 d’agost, olache i ciafëis ince na intervista cun le stilist "Ferdy", che cunta ci che chësc proiet ó dí por ël y ciünes che é les majeres desfides. (pablo)
