La Usc di Ladins

Incö mercui ai 26 d’agost danmisdé él sozedü na burta desgrazia sön Piz da Peres te Mareo, che ti á costé la vita a n zitadin polach de 54 agn. Sciöche le CNSAS lascia alsavëi te n comunicat, ê l’ël sön tru cun la fomena y la cognada, düc atrezá indortöra por fá la via ferata. Ciamó dan le punt olache an pëia ite tla via, é l’ël jü fora dal tru normal, por gaujes nia tleres. Tratan le tentatif da rové zoruch te tru, ál pordü l’ecuiliber y é tomé jö por chi 20 metri, slisoran inant y toman ciamó n iade por incër 80 metri jö por l’ërt. Al é sté d’atri alpinisć che á cherdé i socursc, alarmá dales 10:41. Atira s’á metü sön tru i socoridus dl Aiüt Alpin Mareo, tratan che le joler dl Aiüt Alpin á pié le jore. Por l’ël n’êl indere plü nia da nen fá y le dotur d’emergënza n’á podü fá nia ater che constaté la mort. La Verda de Finanza á surantut les inrescides söl post, a 2.200 metri d’altöra. Dedô é le corp dl defunt gnü condüt tla capela di morc a Al Plan. I familiars é gnüs socodis dal’Assistënza Spirituala. L’intervënt s’á stlüt jö incër les 13:15. Che al palses tla pêsc de Chël Bel Dî.


 (pablo)