La Usc di Ladins

La noela ê bele gnüda fora ai pröms de forá y sëgn ésera tan inant. La Val Badia ciafa n degan nü. Mefodër la domënia passada él sté a La Val na gran mëssa de rengraziamënt por le degan siur Iaco Willeit, che â surantut la inciaria dl 2011 y á chësc ann complí la eté torona de 80 agn. Al é sté na mëssa sintida, te chëra che al é gnü dit n gröm de iadi "Giulan". Sëgn él spo gnü l’ora da passé inant definitivamënter le testemone. Chësc sozeda en domënia ai 30 de agost a Badia, olache al rovará alerch ince le Vësco Ivo Muser, por ti surandé a siur Klaus Sottsas la inciaria da degan dla Val Badia, chëra da ploan de dötes les 12 ploanies dla valada y chëra da surastant dla Unité Pastorala Val Badia. An s’incunta dales 10:00 danmisdé sön plaza dla scora a Badia, por jí spo deboriada en prozesciun cina te dlijia por la santa mëssa. Dedô sarál la poscibilité da incunté y saludé le Vësco y le Degan sön plaza, y da sté adöm pro val’ da bocolé. Por tan grana che la festa y la ligrëza pó ester, é chësc indô n vare che sëgna le gran mudamënt tla dlijia de nosta valada, y che portará indô para – plü adora co tert – na linia de cambiamënc.  (pablo)